Amakuru avugwa muri APR FC n'abakinnyi bashobora kubanza mu kibuga ku mukino wa Mogadishu City

Ni umukino w'ishiraniro kuko APR FC ishaka kurenga ikiciro kibanza cya CAF Champions League, nyuma y’aho umwaka ushize bitayikundiye, ubwo yatsindwaga ibitego 3 kuri kimwe n'ikipe ya Gor Mahia FC.

APR  FC ku wa Kane yari yageze muri Djibouti, ariko izamukana ikibazo cy'umutoza utari ufite ibyangombwa, ndetse bituma uyu mukino atari buwutoze. Mu bakinnyi 27 iyi kipe yahagurukanye, harimo abatari buze kugaragara mu kibuga kubera ikibazo cy'imvune, harimo Ruboneka Bosco wavunikiye i Kigali dore ko banamutwaye babizi neza ko atazakina. Undi mukinnyi ni Kwitonda Bacca, wari ugiye gukina umukino we wa mbere mpuzamahanga w'irushanwa muri APR FC, ariko kubera imvune yagiriye mu mikino ya gicuti, byatumye uyu musore ataza kugaragara kuri uyu mukino kuko bamutwaye bacyeka ko imvune ishobora koroha, gusa byagumye kwanga.

Mogadishu City Club ntabwo ihabwa amahirwe kuri uyu mukino 

Byiringiro Lague we yasigaye ino aha akaba yaragiriye ikibazo cy'imvune mu ikipe y'igihugu Amavubi ubwo yakinaga na Kenya mu cyumweru gishize.

Kwitonda Bacca arashidikanywaho

Abakinnyi bashobora kubanza mu kibuga: Ishimwe Jean Pierre, Karera Hassan, Nsabimana Aimable, Ombolenga Fitina, Mugabo Claude, Mugisha, Nsanzimfura Keddy Mashimwe Djabel Tuyisenge Jacques, Mugisha Gilbert, na Bizimana Yannick.

Mugisha bakunze  kwita Casemiro yitezweho kuziba icyuho cya Niyonzima Olivier

Mogadishu City Club niramuka ibonye igitego Muri APR FC, kiraba kibaye icya mbere mu mateka yayo mu mikino ya CAF Champions League. APR FC yujuje imyaka 8 idatsindira hanze mu mikino ya CAF Champions League, kuko ibiheruka mu 2013 ubwo yatsindaga abaturanyi ba Vital'O, igitego kimwe ku busa. Umukino uratangira ku isaha ya saa kumi z'amanywa, mu gihe umukino wo kwishyura uzaba mu cyumweru gitaha.