CCL: Umukino wa APR FC na Mogadishu City uzakinirwa muri Djibouti aho kubera muri Somalia

Nyuma yuko bigaragaye ko muri Somalia umutekano waho utifashe neza, CAF yategetse ko amakipe yahoo azajya akina imikino mpuzamahanga azajya ashaka ikindi gihugu akiniramo (yakiriramo iyo mikino).

Kuri uyu wa Mbere tariki ya 30 Kanama 2021, nibwo CAF yatangaje ko umukino ubanza wa Champions League uzahuza Mogadishu City Club na APR FC, uzabera kuri Stade Gouled yo muri Djibouti ku wa 12 Nzeri 2021.

Uyu mukino ukazasifurwa n’abanya-Tanzania, bazaba bayobowe na Omary Kayoko Ramadhani Omary uzaba yungirijwe na Frank John Komba na Soud Iddi Lila nk’abasifuzi bo ku mpande, umusifuzi wa kane ni Mfaume Ali Nassoro mu gihe Umunya-Ethiopia Gizate Alemu Mazengia ari we uzaba ari komiseri kuri uyu mukino.

Umukino wo kwishyura uzabera kuri Stade ya Kigali i Nyamirambo ku wa 19 Nzeri ukazasifurwa n’Abanya-Ethiopia, bayobowe na Belay Tadesse Asserese, Kindie Mussie, Shewangizaw Tebabal Tebabal Tadess na Haileyesus Bazezew Belete mu gihe Mustapha Samugabo wo Burundi azaba ari komiseri naho Umunyarwanda Mwanza Jose Nyamusore akaba ari we ukurikirana ibijyanye na COVID-19.

Ikipe izakomeza hagati ya APR FC na Mogadishu City Club izahura na Etoile du Sahel yo muri Tunisa mu ijonjora rya kabiri.

APR FC ifite inzira itoroshye yo kugera mu matsinda ya CAF Champions League