Nta na rimwe nzasaba imbabazi z'uwo ndi we – Marcus Rashford uheruka gukorerwa irondaruhu

Rashford, Jadon Sancho na Bukayo Saka, bahushije penaliti ku mukino wa nyuma wa Euro 2020 u Bwongereza bwatsinzwemo n'u Butaliyani ku cyumweru kuri penaliti 3-2. Uko ari batatu, nyuma y'uwo mukino ku mbuga nkoranyambaga hari bamwe babakoreye ihohoterwa rishingiye ku irondaruhu.

Mu itangazo yasohoye, Rashford yanditse ati: "Niyumvisemo ko ari nkaho natengushye buri muntu wese".

Uyu mukinnyi w'imyaka 23 yongeyeho ati: "Umunsi wose nshobora kwemera kunengwa ku mikinire yanjye, penaliti yanjye ntabwo yari nziza bihagije, yagakwiye kuba yarinjiye mu izamu ariko nta na rimwe nzasaba imbabazi z'uwo ndi we n'aho nkomoka".

"Nta kindi gihe kintera ishema kurusha iyo nambaye umwenda uriho ziriya ntare eshatu [ni na ryo zina ry'ikipe y'igihugu y'Ubwongereza] mu gatuza kanjye no kubona umuryango wanjye umfana uri mu mbaga y'abantu babarirwa mu bihumbi za mirongo".

Ifoto yo kumuha icyubahiro ishushanyije ku rukuta mu mujyi wa Withington aho Rashford avuka, yangijwe mu isura nyuma yuko ahushije penaliti, nyuma iza gushyirwaho ubutumwa bwo kumushyigikira.

Mbere yaho ku wa mbere, umutoza w'ikipe y'igihugu y'u Bwongereza, Gareth Southgate yavuze ko ihohoterwa rishingiye ku irondaruhu ryakurikiye gutsindwa n'u Butaliyani ridashobora kubabarirwa.

Kapiteni w'u Bwongereza, Harry Kane yagize ati "niba uhohotera umuntu uwo ari we wese ku mbuga nkoranyambaga ntabwo uri umufana w'Ubwongereza kandi ntitugushaka".

Kuri Twitter, Kane yongeyeho ati: "Abahungu batatu bitwaye neza cyane mu mpeshyi yose, bagize umuhate wo gufata inshingano yo gutera penaliti ubwo ibintu byari bikomeye".

Minisitiri w'intebe w'u Bwongereza, Boris Johnson n'ishyirahamwe ry'umupira w'amaguru muri icyo gihugu (FA), na bo bamaganye iryo rondaruhu.

Polisi y'u Bwongereza yavuze ko irimo gukora iperereza ryimbitse kuri iryo rondaruhu, ivuga ko ritazihanganirwa na gato, mu gihe urwego rwa leta rushinzwe umutekano mu mupira w'amaguru (UK Football Policing Unit, UKFPU) na rwo rwatangiye iperereza.

Nyuma yo guhusha penaliti ku mukino wa nyuma wa Euro 2020 agakorerwa irondaruhu, Rashford yavuze ko atazigera asaba imbabazi z'uwo ariwe naho akomoka

Ifoto iri mu gace k'aho akomoka yangijwe ariko nyuma ishyirwaho amagambo yo kumushyigikira