RFL
Kigali

Cristiano na Dybala besheje umuhigo w’ibitego 100 muri Juventus umunsi umwe

Yanditswe na: SAFARI Garcon
Taliki:13/05/2021 15:41
0

Rutahizamu w’umunya-Portugal, Cristiano Ronaldo n’umunya-Argentine, Paulo Dybala besheje umuhigo w’ibitego 100 buri wese amaze gutsindira Juventus mu mukino wa shampiyona y’u Butaliyani batsinzemo Sassuolo ibitego 3-1.



Kuri uyu wa gatatu tariki ya 11 Gicurasi 2021, mu Butaliyani hakinwaga umunsi wa 36 wa shampiyona yahoo izwi nka ‘Serie A’, aho Juventus yari ku kibuga Stadio Mapei - Citta del Tricolore cya Sassuolo yatsindiwe mu rugo ibitego 3-1 mu minota 90.

Juventus yafunguye amazamu ku munota wa 28 ku gitego cyatsinzwe na Adrien Rabiot, Cristiano Ronaldo atsindira Juventus igitego cya kabiri ku munota wa 45, mu gihe Paulo Dybala yashyizemo igitego cy’agashinguracumu ku munota wa 66. Igitego kimwe rukumbi cya Sassuolo cyabonetse ku munota wa 59 gitsinzwe na Giacomo Raspadori.

Uyu mukino wasize amateka akomeye ku bakinnyi babiri bakina mu busatirizi bwa Juvntus, Cristiano na Dybala, kuko igitego buri umwe yatsinze cyujuje ibitego 100 buri wese amaze gutsindira iyi kipe.

Cristiano wageze muiri Juventus mu 2018 avuye muri Real Madrid, amaze gutsindira Juventus ibitego 100 mu mikino 131 amaze kuyikinira, ndetse akaba yarayifashije kwegukana ibikombe bibiri bya shampiyona, ndetse na Supercoppa Italiana ebyiri.

Dybala umaze imyaka itandatu muri Juventus, yatsinze igitego cy’ijana (100) mu mikino 252 amaze kuyikinira, ndetse akaba yaranayifashije kwegukana ibikombe 5 bya shampiyona, 3 bya Coppa Italia ndetse na 3 bya Supercoppa Italiana.

Gutsinda uyu mukino byafashije Juventus kugira amanota 72, ikaba yicaye ku mwanya wa 5 mu gihe habura imikino ibiri ngo shampiyona y’uyu mwaka isozwe, shampiyona irangiye gutya Juventus yazakina Europa League, ntiyazagaragara mu makipe azasohokera u Butaliyani muri UEFA Champions League.

Cristiano na Dybala bagejeje ku bitego 100 muri Juventus

Cristiano na Paulo Dybala bashobora kuzakina Europa League umwaka utaha





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND