Afatwa nk'umunyamahirwe kuruta kuba umuhanga! Kuki Zidane agishidikanywaho na benshi yaragejeje Real Madrid kuri byose?

Nubwo yatwaye ibikombe birindwi bikomeye mu myaka ine n'igice amaze atoza Real Madrid, hari abakibona Zidane nk'umuntu wahuriranye n'amahirwe kurusha uko ari umutoza w'umuhanga.

Umunyamakuru w'imikino w'Umufaransa Julien Laurens avuga ku mateka ya Zinedine Zidane mu kiganiro kuri podcast Euro Leagues, Yagize ati:

"Ntiwatwara Champions Leagues eshatu, La Liga ebyiri, ukanatsida imikino 13 muri 14 yo gukuranamo y'amarushanwa y'i Burayi utari umutoza mwiza, ibi birarenze".

Biragoye kubihakana, gusa abantu barabihakana, ndetse benshi.

Nyuma yo gusezererwa na Chelsea muri ½ cya Champions League ku kinyuranyo cy’ibitego 3-1 mu mikino yombi, benshi mu bakunzi b’umupira w’amaguru bongeye kugaragaza impungenge no gushidikanya ku bushobozi bwa Zinedine Zidane.

Zidane yagejeje kuki Real Madrid kuva yayigeramo nk’umutoza?

Kuva uyu mutoza yagera muri Real Madrid tariki ya 4/01/2016 Kugera tariki ya 31/05/2018,  yatoje imikino 149 Intsinzi ku % ibarirwa ku kigiro cya  70.47 akaba yaregukanye ibikombe birimo 1 cya La Liga, Champions League (3), Club World Cup (2).

Kuva tariki ya 11/03/2019 Kugera ubu, Zidane amaze gutoza imikino 109, intsinzi ku % irabarirwa ku kigero cya 60.19 akaba yaregukanye igikombe 1 cya La Liga.

Nta wundi mutoza ku Isi wasangana uyu musaruro mu gihe kingana gitya.

Zidane ni umwe mu batoza batatu gusa bafite ibikombe bitatu bya European Cup/Champions League muri CV zabo, ariko abandi babiri barimo Bob Paisley na Carlo Ancelotti  ntawatwaye bitatu yikurikiranya.

Bwa mbere atoza Real Madrid umwaka wose w'imikino, yatwaye byombi La Liga na Champions League, bwari ubwa mbere muri iyi kipe kuva mu 1958, anatwara igikombe cya Club World Cup, aho mu mikino yose uwo mwaka yayitsinze kuri 70%.

Yongeye kugarurwa nk'umutoza wa Real yatwaye La Liga umwaka ushize, ndetse birashoboka ko uyu mwaka w'imikino ashobora kuwutwaramo indi La Liga n'igikombe cy'i Burayi.

Hari ababona ariko ko ibyo yagezeho biva ku ikipe ikomeye cyane yahawe kurusha ubuhanga bwe - cyane igihe Cristiano Ronaldo yari ku gasongero k'ibihe bye.

Hakiyongeraho ingero z'amahirwe yamusekeye mu kibuga: gutombola ikipe imworoheye no gutsinda kuri za penaliti ikipe ya Atletico Madrid kuri final ya 2016; no mu 2017 muri 1/4 akina na Bayer Munich aho umukinnyi wa Bayern yahabwaga ikarita itukura mu mukino ubanza n'uwo kwishyura, ikanahusha penaliti, hamwe no kubura kubera imvune mu minota 30 ya mbere kwa Mohamed Salah na Loris Karius muri final ya 2018 bakina na Liverpool.

Ku byoZidane yagezeho, ntabwo yirengagiza amahirwe mu rugendo rwe muri Real.

Mu kwezi kwa mbere mu 2020 yabwiye abanyamakuru ati: "Nemera ko nshobora kuba ndi umunyamahirwe, nagiye ngira amahirwe mu buzima. Ngomba kubishimira no kubikorera. Niba utekereza ko ndi umunyamahirwe ubwo ni ko bimeze. Ntabwo ari ikibazo".

Zidane ntashobora kugenzura amahirwe, ariko ashobora kugenzura uko ikipe ye yitwara mu kibuga.

Nk'uko byaganiriweho muri podcast ya Euro League, ni umuhanga mu gutoza kurusha uko abyitwa.

Guillem Balagué, umunya-Espagne w'umwanditsi ku mupira, yagize ati: "Hari ibintu Zidane akora bigira ingaruka ku mupira. Utuntu duto nko kuri Liverpool muri 1/4 cya Champions League ku mukino wo kwishyura no kwemera ko barushijwe mu mukino".

Julien Laurens arakomeza, avuga ko Zidane afata imyanzuro irimo ubwenge adashimirwa ngo avugwe imyato nk'abandi batoza.

Yagize ati: "Bakunze kumwita uwafatiye ku mahirwe? Ibyo ni amafuti. Ashobora kuba atari Johan Cruyff cyangwa Arrigo Sacchi cyangwa Pep Guardiola mu mpinduramatwara y'umupira, ariko iyo Joao Cancelo akina neza mu kugarira bavuga ko ari umuhanga waremwe na Guardiola.

"Ariko iyo Mendy akoze akazi nk'ako muri Real Madrid, nta muntu uvuga ko Zidane ari umuhanga".

Balagué yongeraho ati: "Uyu ni umwaka wo kwiyerekana mu bihe byo gutoza bya Zidane. Kubura kwa Sergio Ramos na Dani Carvajal kubera imvune, kubura kwa Ronaldo wagiye muri Juve, bivuze ko agomba gukoresha ibishoboka byose mu ngufu afite".

Ancelotti, wari wungirijwe na Zidane nk'umutoza wa Real mu 2013-2014, rimwe yakomoje ku hantu impano ya Zidane mu gutoza iri.

Yagize ati: "Zidane afite ibyangombwa byose byo kuba umutoza mwiza:impano, uwo ari we n'inararibonye. Iyo Zidane avuga, abakinnyi barumva".

Bisobanuye impamvu Zidane ari umuntu ukwiriye kuba muri Real, ikipe mu mateka yagiye igura abakinnyi bageze ku gasongero kabo, aho kugura abakiri kuzamuka.

Birashoboka ko icyerekana uburyo Zidane ajyanye neza na Real Madrid ari uburyo iyi kipe yitwaye ubwo yari yatandukanye nayo mu gice cya mbere cy'umwaka w'imikino wa 2018-2019.

Ku butoza bwa Julen Lopetegui n'uwamusimbuye by'agateganyo Santiago Solari, Real yabaye iya gatatu muri La Liga, irushwa amanota 19 na Barça ya mbere, no muri 1/8 cya Champions League yandagazwa na Ajax.

Uyu mwaka Real Madrid isigaranye amahirwe ku gikombe cya shampiyona gusa nyuma yuko ikuwemo mu marushanwa yose yitabiriye.

Zidane niwe mutoza wenyine ku Isi wegukanye Champions League eshati yikurikiranya

Zidane yubatse amateka akomeye muri ruhago ku Isi