FC Barcelona yahigitse mukeba ku rutonde rw'amakipe akize cyane kurusha andi ku Isi! Manchester United yasubiye inyuma

Barcelona yaciye kuri mukeba Real Madrid bahora bahanganye bitari mu kibuga gusa ahubwo no hanze yacyo, ifata umwanya wa mbere n'agaciro ka miliyari 4.76 z'amadolari y'Amerika.

Manchester United yavuye ku mwanya wa gatatu mu makipe y'umupira w'amaguru akize cyane ku Isi, aho yaje ku mwanya wa kane n'agaciro ka miliyari 4.2 z'amadolari y'Amerika, mu gihe Bayern Munich ifite igikombe cya shampiyona y'Ubudage, Bundesliga, yafashe umwanya wa gatatu.

Amakipe yo muri Premier League ya Liverpool, Manchester City, Chelsea, Arsenal na Tottenham, nayo ari mu makipe 10 ya mbere akize ku Isi, nkuko bigaragazwa n'urwo rutonde rwa Forbes.

Amakipe ya Everton, West Ham na Leicester, nk'uko akurikiranye, ari ku myanya ya 15, 18 na 19.

Forbes yavuze ko agaciro rusange k'amakipe 20 ya mbere akize kiyongereyeho 30% mu myaka ibiri ishize, nubwo habayeho ingaruka zivuye ku cyorezo cya Covid-19.

Amafaranga ava mu bafana baje kureba umukino yaragabanutse agera kuri miliyoni 441 z'amadolari y'Amerika mu mwaka ushize w'imikino, igabanuka rya 9,6% ugereranyije no mu mwaka w'imikino wa 2017-2018.

Nubwo kuri United habayeho igabanuka muri rusange ku gaciro, mu mwaka wa 2019-2020 ni yo yakoreye amafaranga menshi (angana na miliyoni 121 z'amapawundi) kurusha indi kipe iyo ari yo yose yo mu makipe 20 ya mbere kuri urwo rutonde rwa Forbes, ndetse muri rusange yunguka miliyoni 468 z'amapawundi.

Amakipe 10 y'umupira w'amaguru ya mbere akize cyane ku Isi:

1. Barcelona: miliyari $4.76

2. Real Madrid: miliyari $4.75

3. Bayern Munich: miliyari $4.22

4. Manchester United: miliyari $4.2

5. Liverpool: miliyari $4.1

6. Manchester City: miliyari $4.0

7. Chelsea: miliyari: $3.2

8. Arsenal: miliyari $2.8

9. Paris St-Germain: miliyari $2.5

10. Tottenham: miliyari $2.3