Kigali

Nta gihugu na kimwe cyo muri EAC kizitabira CAN 2022

Yanditswe na: SAFARI Garcon
Taliki:31/03/2021 10:38
0

Nyuma y’imikino ya nyuma y’amatsinda yo gushaka itike y’igikombe cya Afurika yaraye isojwe mu ijoro ryo kuri uyu wa Kabiri tariki ya 30 Werurwe 2021, yasize nta gihugu na kimwe cyo mu karere ka Afurika y’Iburasirazuba kizitabira irushanwa rya CAN rizabera muri Cameroun mu 2022.



U Rwanda ni rwo rwari ruhanzwe amaso mu ijoro ryakeye, nyuma y'uko ibindi bihugu byari byaramaze gukurayo amaso, gusa byaje kuzamba ubwo rwanganyaga na Cameroun ku kibuga Japoma Stadium 0-0, bituma rusoza ku mwanya wa gatatu mu itsinda F inyuma ya Cameroun na Cape Vert, rubura amahirwe yo kuzagaragara muri CAN 2022.

Uganda yasabwaga kunganya na Malawi igakatisha itike, byayinaniye ku mwanywa y’ihangu, itsindirwa i Lilongwe igitego 1-0, itakaza itike ya CAN 2022 kuko yasoje ku mwanya wa gatatu inyuma ya Burkina Faso na Malawi zabonye itike, mu gihe Sudani y’Epfo bari mu itsinda rimwe yasoje ku mwanya wa nyuma.

U Burundi bwagiye gukina umukino wa nyuma mu itsinda na Maroc bwaramaze gukurayo amaso ku itike ya CAN, nyuma yo kunganya na Central Africa Republic wari wabanje ibitego 2-2 bituma busoza ku mwanya wa gatatu n’amanota atanu, inyuma ya Maroc na Mauritania zabonye itike.

Kenya yagiye gukina umukino wa nyuma wo mu itsinda ifite amahirwe yo kubona itike ya CAN, byarangiye iguye munsi y’urugo nyuma yo gutsindirwa na Togo i Lome ibitego 2-1, bituma itakaza amahirwe yo kuzitabira iri rushanwa kuko yasoje ku mwanya wa gatatu mu itsinda G, inyuma ya Misiri na Comoros zabonye itike.

Gutsinda Libya igitego 1-0 ku mukino wa nyuma mu itsinda, ntabwo byari bihagije kuri Tanzania kugira ngo ibone itike yo kuzakina igikombe cya Afurika, kuko amakosa yakozwe mu mikino yabanje ariyo yabakozeho.

Tanzania yasoje imikino y’amatsinda iri ku mwanya wa gatatu n’amanota 7, nyuma ya Tunisia na Equatorial Guinea zo zabonye itike.

Uyu musaruro w’ibihugu byo muri aka karere ugaragaza ko hakiri intambwe ikwiye guterwa mu mupira w’amaguru kugira ngo kabe akarere gatinyitse ndetse gatana amakipe menshi mu marushanwa nyafurika.

Ibi bihabanye cyane n’ibyari byabaye mu irushanwa riheruka kubera mu Misiri, kuko Akarere ka Afurika y’Uburasirazuba kari gahagarariwe n’ibihugu 4, birimo Uganda, Tanzania, U Burundi na Kenya.

Amavubi yanganyirije muri Cameroun 0-0 abura amahirwe ya CAN 2022

Uganda yaguye munsi y'urugo muri Malawi

Kenya yaburiye itike ya CAN muri Togo





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND