RFL
Kigali

UEFA CL: Mbappe yafashije PSG kwandagaza Barcelona ku kibuga cyayo, Livepool ikura intsinzi muri Hongria - AMAFOTO

Yanditswe na: SAFARI Garcon
Taliki:17/02/2021 10:00
0


Byari agahinda i Barcelona, ibyishimo i Paris nyuma yuko ikipe ya Paris Saint Germain isanze FC Barcelona i Camp Nou ikayihatsindira ibitego 4-1 birimo bitatu bya Klyan Mbappe, mu gihe Liverpool yakuye intsinzi imbere ya Leipzig nyuma y'iminsi itari mike yari imaze itsindwa muri Premier League.



 FC Barcelona yahuriye n’uruva gusenya ku kibuga cyayo nyuma yo kwandagazwa na PSG yabatsinze ibitego 4-1 idafite kizigenza wayo Neymar wavunitse, mu mukino wa 1/8 muri UEFA Champions League, Mbappe yatanzemo ubutumwa bukomeye ku bakunzi ba ruhago ku Isi.

Uyu mukino wabereye ku kibuga Camp Nou, FC Barcelona yagowe cyane na Kylian Mbappe na Leandro Paredes mu minota 90 yose y'umukino kuko bari ku rwego rwo hejuru.

Barcelona ibifashijwemo na Messi yafunguye amazamu ku munota wa 27 ku gitego yatsinze kuri Penaliti nyuma y'ikosa Layvin Kurzawa yakoreye Frenkie de Jong mu rubuga rw’amahina.

Gusa ntabwo iyi penaliti yavuzweho rumwe kuko hari amashusho yagaragazaga ko Frenkie de Jong yiteze gusa umusifuzi Bjorn Kuipers na VAR bemeza ko ari ikosa.

Nyuma y'iminota itanu gusa ku mupira wari uturutse kwa Marco Veratti, Klyan Mbappe yishyuye igitego nyuma yo gucenga ubwugarizi bwa FC Barcelona.

Abakinnyi ba Barcelona barimo Messi na Ousmane Dembele bakomeje kugerageza bashaka gutsinda igitego cya kabiri ariko biranga.

Uburyo bwa Moise Kean yabonye bwashoboraga guhesha PSG igitego cya kabiri ariko Ter Stegen akamubera ibamba nibwo bwasoje igice cya mbere, amakipe ajya kuruhuka anganya 1-1.

Iminota 45 y'igice cya kabiri ntiyahiriye FC Barcelona kuko yatsinzwemo ibitego 3 bituma itakaza umukino.

Ku munota wa 65 Mbappe yatsindiye PSG igitego cya kabiri, ku ishoti rikomeye yateye mu izamu adahagaritse ku mupira wari uvuye kwa Allesandro Florenzi.

Nyuma y'iminota 5 gusa, ku munota wa 70, PSG yabonye coup franc yatewe neza na Paredes wateretse umupira ku mutwe wa Moise Kean wari uhagaze wenyine mu rubuga rw’amahina, ahita atsinda igitego cya gatatu.

Habura iminota 4 ngo umukino urangire, Mbappe yatsindiye PSG igitego cya 4 ku mupira mwiza yaherejwe na Julian Draxler kiba icye cya 3 muri uyu mukino.

Mbappe yabaye umukinnyi wa mbere utsinze ibitego 3 i Camp Nou mu myaka 24 bwa mbere mu myaka 24 ya Champions League.

PSG yongereye amahirwe menshi yo gukomeza muri 1/4, kuko umukino wo kwishyura uzabera Parcs des Prince, FC Barcelona isabwa gutsinda ibitego 4-0 kugira ngo ikomeze mu cyiciro gikurikiyeho.

Mu wundi mukino ubanza wa 1/8 wabereye ku kibuga Puskas Arena muri Hongria, Liverpool yatsinze RB Leipzig ibitego 2-0 byatsinzwe na Mohamed Salah na Sadio Mane, bituma umukino wo kwishyura uzabera Anfield mu Bwongereza uzayorohera.

Mbappe yabaye intwari i Camp Nou nyuma yo gutsinda Barcelona ibitego 3

Messi niwe wafunguye amazamu atsindira Barcelona igitego cya mbere kuri Penaliti


Mbappe yatsinze ibitego bitatu muri uyu mukino

Moise Kean yatsindiye PSG igitego

PSG yatsinze Barcelona 4-1 mu mukino ubanza

Salah yatsindiye Liverpool ku mukino wa Leipzig

Mane yatsinze igitego cya kabiri cyashimangiye intsinzi ya Liverpool

Liverpool yatsinze Leipzig 2-0





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND