Nyuma yuko bamwe mu basesenguzi bakomeye mu mupira w'amaguru ku mugabane w'i Burayi bashyize Manchester United ku rutonde rw'amakipe afite amahirwe yo kwegukana igikombe cya Premier League uyu mwaka, Umutoza w'iyi kipe Ole Gunnar yatangaje ko hakiri kare cyane kuko hakiri urugendo rurerure.
Mu mikino 17 imaze gukinwa muri shampiyona y'u Bwongereza, Manchester United iri ku mwanya wa kabiri n'amanota 33, aho inganya na Liverpool yicaye ku mwanya wa mbere.
Iyi kipe yo mu mujyi wa Manchester ishobora kurara ku mwanya wa mbere kuri uyu wa kabiri tariki ya 12 Mutarama 2021, nitsindira Burnely ku kibuga cyayo.
Nubwo itahiriwe n'amarushanwa atandukanye arimo na Champions League yasezerewemo, Man.United yashyize imbaraga cyane muri shampiyona yuyu mwaka ifite n'amahirwe yo kuzayegukana nitirangaraho.
Gusa umunya-Norvege utoza iyi kipe, Ole Gunnar Solskjaer, atangaza ko gutekereza igikombe magingo aya haba harimo kwibeshya cyane kuko bataragera no muri 1/2 cy'irushanwa, ahubwo igikenewe ari ugukomeza gushaka umusaruro mwiza.
Yagize ati"Ntituragera no muri 1/2 cya shampiyona, dufata buri mukino nk'ikizamini gikomeye kuri twe, kuko nta mukino usa n'undi, yose iba itandukanye. Umukino wa Watford ntusa n'uwa Liverpool, yewe ntunasa n'uwa Fulham".
"Nta numwe uzibuka uko urutonde rwa shampiyona rwari rumeze tariki ya 12 Mutarama 2021. Turi mu bihe byiza, nyuma yo gutakaza umukino wa Manchester City, twagarutse neza kuri Watford, turashaka gukomerezaho".
"Nidutsinda ku wa kabiri, ubwo izaba ibaye intsinzi ku mikino ibiri ikurikiranye, tuzajya gukina umukino ukurikiyeho twifitiye icyizere. Buri mukino muri Premier League, aba ari amahirwe akomeye yo kubaka icyizere cyinshi".
Mu mukino wo kuri uyu wa kabiri, Manchester United iza gukinira ku kibuga Turf Moor, iraza kuba idafite bamwe mu bakinnyi bayo barimo Victor Lindelof, Paul Pogba, Luke Shaw na Eric Bailly bafite ibibazo by'imvune.
Ole yemeza ko hakiri kare cyane kuri Manchester United gutekereza igikombe
Eng
RSS 
TANGA IGITECYEREZO