Umunya-Brazil wabiciye bigacika mu makipe akomeye ku mugabane w'i Burayi arimo AC Milan, Manchester City na Real Madrid, Robson de Souza Santos, wamamaye nka Robinho, yakatiwe n'urukiko rwo mu Butaliyani gufungwa imyaka icyenda kubera icyaha cyo gufata ku ngufu yahamijwe.
Kuri uyu wa kane tariki ya 10 Ukuboza 2020, nibwo urukiko rw'i Milan mu Butaliyani, rwakatiye Robinho igifungo cy'imyaka 9, azira kuba yarafashe ku ngufu umukobwa ukomoka muri Albania mu 2013 ubwo yakiniraga AC Milan.
Uru rukiko rw'i Milan rwavuze ko tariki ya 22 Mutarama 2013, uyu rutahizamu ukomoka muri Brazil yafashe ku ngufu umukobwa w'umunya-Albania w'imyaka 22 y'amavuko, mu kabari gaherereye mu mujyi wa Milan.
Robinho kandi areganwe n'abandi bantu batanu nabo baregwa gufata ku ngufu, barimo n'umunya-Brazil mwenewabo Ricardo Falco, nawe wahanishijwe igifungo cy'imyaka 9.
Abandi bantu bane bashinjwa gufata ku ngufu umugore wari wasinze, urubanza rwabo rwasubitswe. Uretse igifungo cy'imyaka 9, Robinho na Ricardo bategetswe kwishyura indishyi y'akababaro uyu mukobwa y'ibihumbi 60 by'ama-Euros.
Abacamanza bo, bari basabye ko aba bagabo bakatirwa igifungo cy'imyaka 10. Robinho w'imyaka 36 y'amavuko, yakiniye AC Milan kuva mu 2010-2014, ayitsindira ibitego 25 mu mikino 108 yakinnye. Kuri we ahakana yivuye inyuma ibirego ashinjwa.
Robinho yerekeje muri Atletico Mineiro avuye muri Guangzhou Evergrande mu 2016, aho yasoreje umwuga we wo gukina ruhago mu mwaka ushize. Uretse AC Milan yakiniye akanagiriramo ibihe byiza, Robinho, yakiniye amakipe arimo Real Madrid, Manchester City, na Santos y'iwabo.
Robinho yakatiwe gufungwa imyaka icyenda
Eng
RSS 
TANGA IGITECYEREZO