Nyuma y'imyaka 2 Cristiano Ronaldo agiye kongera guhangana na Messi mu kibuga

Kuva Cristiano yava muri Real Madrid akerekeza muri Juventus yo mu Butaliyani mu 2018, ntabwo aba bakinnyi bombi barongera guhurira mu mukino bahanganiye amanota atatu.

Mu ijoro ryo kuri uyu wa kabiri tariki ya 08 Ukuboza 2020, harakinwa umunsi wa nyuma w'imikino yo mu itsinda rya G amakipe yombi aherereyemo. FC Barcelona irakira Juventus muri Espagne, mu gihe i Kyiv muri Ukraine, ikipe ya  Dynamo Kyiv iza kwakira Ferencvaros.

Mbere yuko bakina umukino wa nyuma wo mu itsinda, Barcelona iri ku mwanya wa mbere n'amanota 15, igakurikirwa na Real Madrid n'amanota 12, mu gihe Dynamo Kyiv na Ferencvaros zinganya inota rimwe, ndetse mu mukino uzihuza zigomba kwishakamo izajya muri Europa League.

Nubwo muri iri tsinda byamaze gusobanuka ku makipe azerekeza muri 1/8 cya Champions League, umukino wa Barcelona na Real Madrid uraba ukomeye cyane kuko ntiharamenyekana ikipe izamuka iri ku mwanya wa mbere, ndetse aho Messi yahuriye na Cristiano haca uwambaye.

Ishyaka mu kibuga, guharanira gutsinda ibitego ni bimwe mu biranga umukino Messi yahuriyemo na Cristiano.

Aba bakinnyi baba barahuriye mu mukino ubanza Barcelona yatsindiye Juventus mu Butaliyani, ariko icyo gihe Cristiano yari mu kato kubera yari yaranduye Coronavirus.

Messi aheruka guhura na Cristiano bahanganye mu kibuga igihe uyu munya-Portugal yakinaga muri Real Madrid, mu mukino wa EL Clasico uhuruza Isi yose, ariko watakaje icyanga ubwo uyu mukinnyi yayivagamo yerekeza muri Juventus.

Cristiano na Messi bamaze imyaka 10 bayoboye Isi mu mupira w'amaguru, aho basaranganyije ibihembo bikomeye bitangwa ku mukinnyi mwiza muri ruhago ku Isi ndetse bakora n'ibikorwa bibashyira ku rundi rwego rutandukanye na bagenzi babo.

Kuri ubu Cristiano na Messi, nibo bakinnyi bafatwa nk'abayoboye abandi ku Isi, mu bagikina ndetse bakaba banashyirwa mu bakinnyi b'ibihe byose mu mateka ya ruhago.

Lionel Messi yaciye agahigo ko kwegukana imipira ya zahabu 6 ihabwa umukinnyi w'indashyikirwa buri mwaka ku Isi, akaba akurikiwe na Cristiano Ronaldo umaze kwegukana imipira itanu.

Cristiano na Messi bagiye kongera guhangana mu kibuga nyuma y'imyaka ibiri