RFL
Kigali

Liverpool mu ihurizo rikomeye nyuma yo kuvunikisha ba myugariro bayo bose

Yanditswe na: SAFARI Garcon
Taliki:13/11/2020 15:23
0


Uretse Andy Robertson muzima, abandi bakinnyi bakina mu bwugarizi bwa Liverpool bibasiwe n'imvune zishobora gutuma bamara igihe kirekire batagarutse mu kibuga, ni ikibazo gikomeye ku mutoza Jurgen Klopp wari ufite intego yo kwiruka ku gikombe cya shampiyona muri uyu mwaka.



Joe Gomez uheruka kugirira imvune mu ikipe y'igihugu y'u Bwongereza, yabaye umukinnyi wa gatandatu wa Liverpool uvunitse, aba myugariro wa gatatu ubanza mu kibuga uvunitse nyuma ya Virgil ushobora kugaruka mu kibuga umwaka utaha ndetse na Trent Arnold nawe ushobora gusubira mu kibuga mu Ukuboza.

Mu bakinnyi basanzwe babanza mu kibuga, mu bwugarizi, Andy Robertson niwe usigaye ari muzima ariko nawe bivugwa ko nawe atameze neza 100% kuko mu mukino aheruka gukina yavuye mu kibuga acumbagira.

Undi myugariro wakabaye aziba icyuho mu mutima w'ubwugarizi, ni Joel Matip wari umaze hafi ukwezi ari hanze y'ikibuga kubera imvune, gusa nawe ntaragaruka mu bihe byiza ku buryo yagenderwaho, agaheka ikipe nkuko abavunitse babikoraga.

Joe Gomez wavunikiye mu ikipe y'igihugu y'u Bwongereza, azagaruka mu kibuga nyuma y'amezi atandatu, akaba yaragize imvune ikomeye ku Ivi.

Virgil Van Dijk wavunitse ukuguru ku mukino wa Everton, azagaruka mu kibuga amaze hejuru y'amezi atandatu.

Trent Alexander-Arnold umaze igihe yaravunitse akagombambari, azagaruka mu kibuga mu kwezi gutaha ku Ukuboza.

Abandi bakinnyi ba Liverpool bafite imvune barimo Alex Oxlade-Chamberlain, Thiago Alcantara na Fabinho bazagaruka mu kibuga nyuma y'ibyumweru bitatu.

Liverpool iri ku mwanya wa gatatu muri shampiyona y'u Bwongereza, aho mu mikino umunani imaze gukina ifite amanota 17, intego y'umutoza Jurgen klopp muri uyu mwaka ni ukwisubiza igikombe cya shampiyona, gusa ariko atangiye gukomwa mu nkokora n'imvune za hato na hato z'abakinnyi.

Abasesenguzi muri ruhago bemeza ko ari ikizamini gikomeye kuri Liverpool ndetse byaba ari nk'inzozi ku mutoza Klopp gutekereza igikombe cyangwa gusoza mu makipe ane ya mbere adafite ubwugarizi bukomeye.

Bemeza ko muri Mutarama 2021, Liverpool ariyo kipe ya mbere izajya ku isoko ry'abakinnyi ishaka ba myugariro kandi bafite amazina akomeye kugira ngo baze gufasha Liverpool mu rugamba rwo guhatanira ibikombe.

Uretse shampiyona y'u Bwongereza n'ibindi bikombe by'imbere mu gihugu, Liverpool irahatanira igikombe cya UEFA Champions League muri uyu mwaka.

Joe Gomez yavunikiye mu ikipe y'igihugu y'u bwongereza

Trent Arnold azagaruka mu kibuga mu Ukuboza

Van Dijk wavunikiye ku mukino wa Everton azagaruka mu kibuga hejuru y'amezi 6





TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND