Kuri uyu wa Gatandatu tariki 17 Ukwakira 2020, saa 18h30 ku kibuga etihad bizaba ari ibicika hagati ya Manchester City na Arsenal mu mukino w'umunsi wa Gatanu wa shampiyona y'u Bwongereza 'Premier League'.
Arsenal igiye gukina umukino wa Gatanu iri ku mwanya wa kane n'amanota 9, mu gihe Manchester City izaba ikina umukino wa kane iri ku mwanya wa 14 n'amanota 4 mu mikino itatu gusa imaze gukina.
Manchester City izaba iri mu rugo, ntizaba ifite inkingi ya mwamba mu kibuga hagati Kevin de Bryune wagiriye imvune mu ikipe y'igihugu y'u Bubiligi.
Umutoza Pep.Guardiola yatangaje ko imvune ya De Bryune idakanganye cyane ariko ko atazakina uyu mukino kugira ngo akire neza azakine imikino ikurikiyeho nta mpugenge zo kuvunika afite.
Umunya-Brazil Gabriel Jesus nawe ntazagaragara kuri uyu mukino kubera ikibazo cy'imvune amaranye igihe.
Gusa ku rundi ruhande, Guardiola afite amakuru meza yo kugaruka mu kibuga kwa Raheem Sterling wari wagiriye ikibazo mu ikipe y'igihugu, Sergio Aguero na Ilkay Gundogan.
Ku ruhande rwa Arsenal, Thomas Partey azakina umukino we wa mbere muri iyi kipe nyuma yo kuyisinyira avuye muri Atletico Madrid yo muri Espagne.
Iyi kipe kandi izaba ifite kapiteni wayo Aubameyang wari umaze iminsi afite akabazo k'imvune ariko kadakanganye.
Arteta kandi araza kuba yagaruye myugariro Kieran Tierney wari umaze igihe atagaragara mu kibuga kubera imvune.
Arsenal ntabwo izaba ifite abakinnyi barimo; Emile Smith Rowe, Pablo Mari na Shkodran Mustafi, bitegura kugaruka mu kibuga muri uku kwezi, mu gihe Gabriel Martinelli na Calum Chambers bari hanze y'ikibuga by'igihe kirekire.
Mu mwaka ushize w'imikino, Manchester City yatsinze Arsenal umukino ubanza n'uwo kwishyura ibitego 3-0.
ABAKINNYI 11 BASHOBORA KWITABAZWA KU MPANDE ZOMBI:
Manchester City XI: Ederson; Walker, Dias, Laporte, Mendy; Foden, Rodri, Gundogan; Bernardo, Mahrez na Sterling
Arsenal XI: Leno; Bellerin, Luiz, Gabriel, Tierney; Ceballos, Thomas, Saka; Willian, Lacazette na Aubameyang.
De Bryune wagiriye ikibazo mu ikipe y'igihugu ntazakina umukino wa Arsenal
Thomas Partey azakina umukino we wa mbere muri Arsenal
Aubameyang arahari ku mukino wa Manchester City
Eng
RSS 
TANGA IGITECYEREZO