Iyahigaga yahiye ijanja! Ibihugu bitanu 5 by’ibikomerezwa ni byo byibasiwe na Coronavirus cyane ku Isi

Umwaka wa 2020 benshi batangiye kuwuvumira ku gahera aho bamwe batanatinya kuwita umwaka w'amage mu yabayeho yose. Ku rundi ruhande, bamwe barawita umwaka wo guca bugufi ku bihugu by’ibikomerezwa cyangwa undi wese dore ko buri muntu ku Isi ari umukandita mu kurwara iki cyorezo.

Ubu urujijo ni rwose ku batuye Isi ku bijyanye n'iki cyorezo cyoretse Isi. Amatwi ya benshi anyotewe no kumva inkuru nziza y’igihe umuti uzabonekera, abandi amaso yiteguye gusoma inkuru ivuga ko umuti cyangwa urukingo rwabonetse.

Magingo aya, inzobere mu buvuzi ibitotsi ni byose kuko kuryama kuri zo ni ubugwari ariko abategetsi b'ibihugu by’ibikomerezwa ubwoba n’ikimwaro ni byose kuko bari gushinjwa n’imitima yabo ndetse n’amagambo ya rubanda ruri kubura ababo kubera iki cyorezo ndetse n’inzara y’umurengera babasaba kugira icyo bakora nk'abantu babarebera.

Ku Isi abarwayi ba Coronavirus ni 1,210,416, abamaze guhitanwa na yo ni 65,449, abayikize ni 251,822 naho ibihugu imaze kugeramo ni 206. Ibijyanye n'urukingo ubu ku Isi hari ibigo 20 biri gukora amasigamana ngo birebe ko byacungura Isi.

Ubu igihugu cya Leta Zunze Ubumwe za Amerika ni cyo kiyoboye ibindi mu kugira umubare mwinshi w’abarwayi kuko abagera kuri 25.8% by’abarwayi ba covid-19 bose ni Abanyamerika naho u Butaliyani ni ubwa mbere mu kugira umubare mwinshi w’abamaze guhitanwa n'iki cyorezo, abagera kuri 23.71% by’abamaze kwamburwa ubuzima na covid-19 bose ni abo muri iki gihugu.

Ibihugu bitanu 5 bya mbere Covid-19 yibasiye:

1. USA (Leta Zunze Ubumwe za Amerika)

Umubare w’abarwaye covid-19: 311,637

Umubare w'abo imaze guhitana: 8,454

Abamaze kuyikira: 14,828

2. Spain

Umubare w’abarwaye covid-19: 126,168

Umubare w'abo imaze guhitana:11,947

Abamaze kuyikira: 34,219

3. Italy

Umubare w’abarwaye covid-19: 124,632

Umubare w'abo imaze guhitana: 15,362

Abamaze kuyikira: 20,996

4. Germany

Umubare w’abarwaye covid-19: 96,092

Umubare w'abo imaze guhitana: 1,444

Abamaze kuyikira: 26,400

5. France

Umubare w’abarwaye covid-19:89,953

Umubare w'abo imaze guhitana: 7,560

Abamaze kuyikira: 15,438

Mu Bushinwa ari naho iyi ndwara yatangiriye, ubu abarwayi baragabanutse ndetse n’ibikorwa bisanzwe byinshi batangiye kongera kubikora nk'uko bisanzwe, igisigaye ni ugufungura amashuli. Mu guhashya iki cyorezo abashinwa bakoresheje imbaraga zihambaye ziganjemo ikoranabuhanga rihanitse ndetse bivugwa ko byagora undi washaka kurikoresha.

Src: worldometers.info