RFL
Kigali

Umutoza wa Arsenal Mikel Arteta na rutahizamu wa Chelsea Hudson-Odoi bamaze kwandura Coronavirus

Yanditswe na: SAFARI Garcon
Taliki:13/03/2020 11:08
0


Nyuma yo gutinya bivanze no gukenga ko muri Arsenal hashobora kuba hari abanduye Coronavirus ku mukino wabahuje na Olympiacos, byatumye abakinnyi bagashyirwa mu kato iminsi 14, byarangiye umutoza w’iyi kipe Mikel Arteta ariwe ugaragaweho iki cyorezo kitanasize rutahizamu wa Chelsea Hudson-Odoi.



Mu itangazo ryashyizwe ahagaragara n’iyi kipe ku mugoroba wo kuri uyu wa Kane, rivuga ko yabaye ifunze ikibuga cyayo cy’imyitozo ndetse n’abantu baheruka guhura na Mikel Arteta bakaba bashyirwa mu kato, barimo abafatanya n’uyu mutoza mukuru.

Mikel Arteta w’imyaka 37, wababajwe n’ibisubizo yahawe, avuga ko nyuma yo kumva atameze neza, yisuzumishije bagasanga yaramaze kwandura Coronavirus, yavuze kandi ko azagaruka mu kazi bidatinze mu gihe azaba abyemerewe.

Mu mukino wa Shampiyona uzaba ku Cyumweru uzahuza Arsenal na Brigthon, biteganyijwe ko Arteta atemerewe no gukandagira ku kibuga kugeza igihe azahererwa uburenganzira n’abaganga agasubira mu kazi.

Mu ikipe y’abaturanyi ya Chelsea basangiye umujyi wa London, ishyamba si ryeru namba kuko icyorezo cya Coronavirus naho cyamaze kuhagera, kikaba cyahereye kuri rutahizamu w’iyi kipe  Hudson-Odoi wamaze kugaragarwaho Coronavirus.

Mu itangazo ryasohowe n’ikipe ya Chelsea ku mugoroba wo kuri uyu wa kane, iyi kipe yavuze ko nyuma yo gusuzuma Odoi basanze yaranduye iki cyorezo, akaba yashyizwe mu kato ndetse n’abaheruka guhura nawe bakaba bashyirwa mu kato.

Abakinnyi batatu ba Leicester City bashyizwe mu kato mu gihe Chelsea yasubitse imyitozo ejo hashize, ku wa Kane, kubera iki cyorezo.

Ibikorwa by’imikino mu Butaliyani byamaze guhagarikwa kugeza tariki ya 3 Mata mu gihe na Shampiyona ya Espagne, La Liga ndetse n’ibikorwa byose by’umupira w’amaguru mu Bufaransa nabyo byahagaritswe.

Bamwe mu bakinnyi bakomeye mu mikino itandukanye bamaze kwandura iki cyorezo, barimo Rudy Gobert ukinira Utah Jazz muri NBA,Fernando Gaviria ukinira UAE Team Emirates muri Cycling,Danielle Rugani wa Juventus n’abandi.


Arteta yashyizwe mu kato nyuma yo kwandura Coronavirus


Hari impungenge zikomeye ko abakinnyi ba Arsenal banduye Coronavirus


Odoi ukinira Chelsea yamaze kwandura Coronavirus






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND