Ahabanza Imikino

VOLLEYBALL: UTB VC yakomeje gutanga ubutumwa ku gikombe nyuma yo kunyagira APR VC-AMAFOTO

Yanditswe na: Mihigo Saddam
Taliki:24/01/2019 13:56 0

Ikipe ya UTB VC ikomeje gahunda y’urugendo rugana ku gikombe cya shampiyona 2018-2019 nyuma yo kuba ikiri ku mwanya wa mbere n’amanota 28, intego yagezeho itsinze APR VC amasetin 3-0 (25-15, 25-18, 25-23).

Byari mu mukino bahuriyemo ku mugoroba w’uyu wa Gatatu tariki 23 Mutarama 2019 muri sitade nto ya Remera. UTB VC yagaragaje ko nta gitutu yari itewe no gucakirana na APR VC iheruka gutsinda REG VC.

Seti ya mbere yabaye ubufindo kuko UTB VC yatsinze amanota 25 mu gihe APR VC yari ikiri ku manota 15 mbere yuko batsinda seti ya kabiri n’amanota 25 kuri 18. Seti ya gatatu nibwo APR VC yagaragaje ko ifite imbaraga kuko bayitsinze amanota 25 igeze ku manota 23.

UTB VC ubu ifite itike yo kuzakina imikino ya Play-Offs

Nyma y’uyu mukino, UTV VC yahise yuzuza amanota 28 mu mikino 12 ya shampiyoba bamaze gukina. Ikipe ibari hafi ni REG VC imaze gukina imikino icumi (10) ikaba ifite amanota 23.

APR VC kuri ubu iri ku mwanya wa gatandatu (6) n’amanota arindwi (7) mu mikino icumi (10) bamaze gukina. Gisagara VC ifite igikombe cya shampiyona 2017-2018 iri ku mwanya wa gatatu (3) n’amanota 23 mu mikino icumi (10).