APR BBC na REG BBC mu mukino w'ishiraniro – Ni nde ukubita undi inshuro ?

Shampiyona y’u Rwanda mu mukino wa Basketball irakomeza kuri uyu wa Gatatu, aho hateganyijwe imikino ibiri ikomeye. Umukino wa mbere uzahuza Orion BBC na Tigers BBC saa kumi n'ebyiri (18:00), mu gihe umukino wa kabiri uzahuza APR BBC na REG BBC saa mbiri n'igice (20:30).

Orion BBC iri ku mwanya wa karindwi n’amanota icyenda (2-5), mu gihe Tigers BBC iri ku mwanya wa gatandatu n’amanota icumi (3-4). Aya makipe yombi arashaka kwitwara neza kugira ngo akomeze kuzamura imyanya yabo ku rutonde rwa shampiyona. Tigers BBC iri mu bihe byiza, kandi yizeye gukomeza uwo muvuduko no kwitwara neza imbere ya Orion BBC.

Umukino utegerejwe na benshi ni uzahuza APR BBC na REG BBC, amakipe yombi ahabwa amahirwe yo kwegukana igikombe cya shampiyona. APR BBC ni yo iyoboye shampiyona n’amanota 26 (13-0), mu gihe REG BBC iri ku mwanya wa kabiri n’amanota 18 (9-4).

APR BBC irashaka gukomeza agahigo kayo ko gutsinda imikino 14 yikurikiranya, mu gihe REG BBC ifite intego yo guhagarika iyo ntsinzi no kwihimura ku byayibayeho mu myaka yashize. 

Mu mukino ubanza wa shampiyona wabereye muri BK Arena tariki ya 7 Werurwe 2025, APR BBC yatsinze REG BBC ku manota 64-61, nyuma yo gukina iminota y’inyongera (overtime), kuko iminota isanzwe y’umukino yari yarangiye ari 59-59.

REG BBC imaze imikino 15 idatsinda APR BBC mu marushanwa atandukanye, bivuze ko uyu mukino ari amahirwe akomeye yo kwihimura no kugaragaza ko ishobora guhangana n’ikipe iyoboye shampiyona.

Muri shampiyona ya 2024, APR BBC yegukanye igikombe itsinze Patriots BBC muri playoffs ku ntsinzi ya 4-2. REG BBC nayo yari ifite ikipe ikomeye, ariko yasezerewe na APR BBC mu mikino 4 muri 7 ya kamarampaka ya shampiyona ya 2023.

 Abakinnyi REG BBC yakoresheje mu mukino ubanza wabaye tariki ya 7 Werurwe 2025

 Abakinnyi APR BBC yakoresheje mu mukino ubanza tariki ya 7 Werurwe 2025