‎APR WVC yerekeje muri Nigeria, Kapiteni wayo atanga icyizere

‎Iyi kipe yahagurutse ku kibuga cy'indege i Kanombe mu gicuku gushyira kuri uyu  wa Kabiri.

‎‎Ni ikipe yahagurukanye abakinnyi 14 abatoza 2, ushinzwe kongera ingufu abakinnyi, muganga ndetse n’ababaherekeje.

‎‎Abakinnyi bagiye ni Mpuhwezimana Diane, Dusabe Flavia,Amito Sharon,Akimanizanye Ernestine,Musabyemariya Donatha,Uwiringiyimana Albertine,Gasekgonwe Gaoleseletse,Uwamahoro Beatrice,Mukantambara Seraphine,Munezero Valentine,Kabatesi Judith,Nyirahabimana Divine,Mukandayisenga Benitha na Bayayija Yvonne.

‎‎Kapiteni w'ikipe ya APR WVC, Munezero Valentine yavuze ko imyitozo itegura iyi mikino bayikoze neza ndetse avuga ko icyizere gihari.

‎‎Yagize ati"Imyitozo yacu twayikoze neza nk’abantu bitegura amakipe yabaye ya mbere iwayo, ndakeka uko duhagurutse i Kigali duhagaze neza mu buryo bw’imyitozo.Icyizere kirahari ubushize ubwo duherukayo twabaye ba 6 ariko ubu ngubu mu buryo bwo kwitwara neza turi  hejuru kurusha uko twari tumeze icyo gihe, rero nta gihindutse nkeka twagera imbere ugereranyije n’ubushize. 

‎‎Yavuze ko ugereranyije n’ubushize urwego abakinnyi bariho kuri ubu rwazamutse.

‎‎Yavuze ko kandi  ubuyobozi bwabasabye intsinzi ariko nabo ko bagomba gutanga ibyabo byose.

‎‎Yagize ati"Ubuyobozi igihe cyose budusaba intsinzi ariko natwe tugiye gutanga ibyacu byose nta na kimwe dusize inyuma kandi nkeka ko hamwe n’Imana byose bishoboka".

‎‎Biteganyijwe ko ikipe igomba kugera  i Abuja kuri uyu wa Kabiri Saa Sita.

‎Irushanwa rya CAVB Club Championship 2025) rizatangira tariki ya 3 kugeza ku  ya 14.

APR WVC yerekeje muri Nigeria

Abakinnyi ba APR WVC berekeje muri Nigeria