Ikipe y'igihugu ya Brazil yirukanye umutoza nyuma yo gusebywa na Argentia

Brazil iri ku mwanya wa Kane mu itsinda rya Amerika y'Amajyepfo, nyuma yo gutsindwa imikino itanu muri 14 bamaze gukina. Nubwo batsinzwe inshuro nyinshi, baracyafite amahirwe yo kubona itike y'Igikombe cy'Isi.

Dorival Junior, w'imyaka 62, yari amaze amezi 14 atoza Brazil, aho yagizwe umutoza mukuru muri Mutarama 2024. Umukino we wa mbere wari uwo Brazil yatsinzemo u Bwongereza igitego 1-0 kuri Wembley mu mukino wa gicuti wabaye muri Werurwe 2024.

Muri rusange, yatoje Brazil imikino 16, atsinda 7, anganya 6, atsindwa 3.

Nyuma yo gutsindwa na Argentina bamaze kuyihesha itike y’Igikombe cy’Isi, Ishyirahamwe ry’Umupira w’Amaguru muri Brazil (CBF) ryatangaje ko ritandukanye na Dorival.

Mu itangazo rigufi, CBF yavuze iti: "Ubuyobozi bumwifurije amahirwe mu rugendo rwe rw’umwuga. Guhera ubu, CBF iratangira gushaka umutoza mushya."

Dorival Junior, utigeze akinira ikipe y’igihugu ya Brazil nk’umukinnyi, yigeze gutozaa Flamengo yegukana Copa Libertadores mu 2022 ari na yo ntsinzi ikomeye yagize nk'umutoza.

Itangazamakuru ryo muri Brazil rivuga ko Jorge Jesus, umutoza wa Al-Hilal, ari we ushobora gusimbura Dorival.

Brazil yagerageje kuganira na Carlo Ancelotti utoza Real Madrid mbere yo guha akazi Dorival, ariko ntibyashobotse.

Amakuru ya The Athletic avuga ko Brazil yifuza kongera kuganira na Ancelotti ku bijyanye no kuyobora iyi kipe mu Gikombe cy’Isi cya 2026.

Ikipe y'igihugu ya Brazil yatandukanye n'umutoza wayo Dorval Junior

Dorval Junior yari amaze umwaka n'igice atoza Brazil