Canada mu matora yihuse kubera Trump

 Iyi myanzuro yaje nyuma y'igitutu cy’ibihano by’ubucuruzi Perezida Donald Trump yashyize ku bicuruzwa bya Canada ndetse n’amagambo akakaye avuga ko Canada ikwiye kuba leta ya 51 ya Leta Zunze Ubumwe za Amerika.

Perezida Trump yongereye ibihano ku bicuruzwa bya Canada, bitera umwuka mubi hagati y'ibihugu byombi ndetse bigira ingaruka zikomeye ku bukungu bwa Canada.

Mu rwego rwo gushimangira ubuyobozi bwe muri ibi bihe bikomeye, Mark Carney yahisemo gutumiza amatora yihuse kugira ngo ashimangire icyizere mu baturage no guha ubutegetsi bwe manda isesuye.

Mark Carney, w’imyaka 59, yavukiye muri Fort Smith, Northwest Territories, muri Canada. Yabaye Guverineri wa Banki Nkuru ya Canada ndetse na Banki Nkuru y'u Bwongereza, aho yagaragaje ubuhanga mu miyoborere y'ubukungu.

Nubwo atari asanzwe ari mu ruhando rwa politiki, Carney yatsinze amatora yo kuyobora ishyaka rya Liberal Party ku majwi 85.9%, bituma aba Minisitiri w'Intebe asimbura Justin Trudeau. 

Nk'uko byatangajwe na Reuters, Carney yavuze ko gutumiza amatora yihuse ari uburyo bwo gushimangira icyizere no gukomeza gukorera inyungu z'igihugu mu bihe bikomeye igihugu kirimo guhangana na Amerika.

Nyuma y’itangazo rya Trump, amarangamutima y'ubwigenge yatumye abaturage benshi birinda gukoresha ibicuruzwa by’Amerika no kugabanya ingendo zijyayo.

Ibi byahaye Carney icyizere cyo gushyigikirwa n’abaturage mu matora yegereje, dore ko abaturage bakomeje gushaka umuyobozi ufite ubushobozi bwo guhangana n’igitutu cyaturutse ku butegetsi bwa Trump.

Aya matora yihuse aratanga amahirwe yo kwerekana icyizere abaturage bafitiye ubuyobozi bwa Carney no gushimangira ubwigenge bw’igihugu imbere y'igitutu cya Trump.

Ni urugamba ruremereye kuri Minisitiri w’Intebe mushya, ariko kandi ni n’amahirwe yo kwereka abatuye Canada ko bafite ubuyobozi bufite umurongo uhamye mu bihe bikomeye.

 Mark Carney Minisitiri w'intebe wa Canada 

 Perezida Trump wa Amerika