George Foreman wari ikirangirire mu mukino w'iteramakofi yitabye Imana

Yamenyekanye cyane kubera intambara ye ikomeye na Muhammad Ali mu 1974, izwi nka "Rumble in the Jungle." Iyi ntambara yabaye amateka, kandi ni imwe mu nzibutso zikomeye mu mateka y'iteramakofi.

George Foreman yavukiye i Marshall, Texas, ku ya 10 Mutarama 1949. Yagize ubuzima bukomeye mu bwana bwe, ariko yabashije kwinjira mu gahunda ya Job Corps akabona amahirwe yo guhindura ubuzima bwe. 

Nyuma y'umwaka umwe, yatangiye gukina iteramakofi, kandi yaje kwegukana umudali wa zahabu mu mikino Olempike ya Mexico mu 1968.

Mu 1973, Foreman yatsinze Joe Frazier mu mukino w'igikombe cy'isi, agahita atangira kuganza mu iteramakofi. Icyamamare cye cyaje kugerwaho mu 1974 ubwo yahuye na Muhammad Ali mu intambara itunguranye mu gihugu cya Zaïre. 

Ali yatsinze Foreman mu gice cya 8, ariko uyu mukino wabaye umwe mu bihe bikomeye mu mateka y'iteramakofi.

Nyuma y'igihe gito, Foreman yagarutse mu iteramakofi mu 1987, aho yatsinze Michael Moorer mu 1994, akabera umukinnyi mukuru watsindiye igikombe cy'isi cya heavyweight afite imyaka 45, bigaragara ko yari afite imbaraga zikomeye kandi atageze mu gihe cyo kugarira.

Nubwo yari umukinnyi w'iteramakofi, George Foreman yabaye kandi umucuruzi w'ibikoresho byo guteka, aho izina rye ryamenyekanye cyane kubera "George Foreman Grill." 

Iki gikoresho cyamufashije kumenyekana ku rwego rw'isi no kugera ku bukire butari buke. Yanabaye umupasiteri w’itorero, aho yagaragaje ukwemera kwe mu buzima bwe.

George Foreman yari afite abana 12, harimo abahungu batanu n'abakobwa barindwi. Urupfu rwe ni igihombo gikomeye ku isi y'iteramakofi n'ubucuruzi, ariko umurage we uzahora ugaragaza urugero rwo kurwanya no kugera ku ntsinzi.

George Foreman na Muhammad Ali mu mukino w'amateka wabereye muri DRC yahoze ari Zaire

George Foreman ni umwe mu bakinnyi beza Isi yagize mu bakinnyi ba boxing