Umuhanzikazi Roberta Flack yitabye Imana ku myaka 88

Uyu muhanzikazi w’icyamamare yaguye mu rugo rwe ku wa 24 Gashyantare 2025, ari kumwe n’umuryango we. Mu mwaka wa 2022, yari yatangaje ko arwaye ALS (Amyotrophic Lateral Sclerosis), indwara yamugoye cyane kugeza ubwo itumye atakibasha kuririmba no kuvuga neza.

Roberta Flack yavukiye muri North Carolina, muri Leta Zunze Ubumwe za Amerika. Kuva mu bwana bwe, yagaragaje impano idasanzwe mu muziki, bituma ahabwa buruse yo kwiga muri Kaminuza ya Howard, aho yihuguraga mu gucuranga piano.

Mu myaka ya 1960, yamenyekanye binyuze kuri Les McCann, umuhanzi wa jazz wamufashije kubona amasezerano na Atlantic Records. Nyuma yaho, mu mwaka wa 1969, yasohoye album ye ya mbere yise "First Take".

Mu mwaka wa 1972, indirimbo ye "The First Time Ever I Saw Your Face" yakoreshejwe muri filime ya Clint Eastwood yitwa Play Misty for Me. Ibi byatumye iyi ndirimbo yamamara cyane, ndetse inegukana igihembo cya Grammy cya 'Record of the Year'.

Mu mwaka wakurikiyeho, yongeye kwegukana iki gihembo ku ndirimbo "Killing Me Softly with His Song", aba umuhanzi wa mbere wagitwaye inshuro ebyiri zikurikiranya.

Roberta Flack yari umuhanzi w’igitangaza, uzwiho guhuza injyana zitandukanye nka jazz, folk, na soul mu buryo bwihariye. Yakoranye n’abahanzi bakomeye barimo Donny Hathaway, Peabo Bryson, na Maxi Priest. Indirimbo ze nka "Feel Like Makin' Love", "Where Is the Love", na "The Closer I Get to You" zakunzwe cyane ku isi hose.

Uretse umuziki, yari n’umuntu ukunda ibikorwa by’ubugiraneza. Yashinze ishuri ry’umuziki ryitwa "Roberta Flack School of Music" mu gace ka Bronx, rifasha abana bakomoka mu miryango itishoboye kubona ubumenyi mu muziki.

Urupfu rwa Roberta Flack ni igihombo gikomeye ku isi y’umuziki. Nyamara, umurage we uzakomeza kubaho binyuze mu bihangano bye, bikomeje gutanga ubutumwa bwimbitse ku bakunzi b’umuziki ku isi hose. Indirimbo ze zizahora ari igisobanuro cy’ubuhanga bwe n’umutima yagiraga wo kugeza ku bantu ubutumwa bwiza binyuze mu muziki.

Umwanditsi : Kubwayo Jean de la Croix