Liverpool yisanze kwa PSG: Uko tombola ya 1/8 cya UEFA Champions League yagenze

Kuri uyu wa Gatanu tariki ya 21 Gashyantare 2025 Saa Saba ku cyicaro cy'impuzamashyirahamwe y'umupira w'amaguru ku mugabane w'Iburayi i Nyon mu Busuwisi ni bwo habereye tombola yuko amakipe azahura muri 1/8 cya UEFA Champions League nyuma y'uko kuwa Gatatu w'iki Cyumweru aribwo imikino ya kamparamaka yasojwe gukina.

Muri iyi tombola amakipe 8 yari yarabonye itike mbere yatomboye andi 8 yabonye itike binyuze mu mikino ya kamparamaka.

Paris Saint-Germain yatomboye kuzacakirana na Liverpool, Club Brugge itombora Aston Villa, Real Madrid itombora Atletico Madrid, PSV Eindhoven itombora Arsenal, Benfica itombora FC Barcelona, Borussia Dortmund itombora Lille, FC Bayern Munich itombora Bayer Leverkusen naho Feyenoord itombora Inter Milan.

Muri 1/4 izava hagati ya PSG na Liverpool izahura n'izava hagati ya Club Brugge na Aston Villa naho izava hagati ya Arsenal na PSV Eindhoven yo izahure n'izava hagati ya Real Madrid na Atletico Madrid.

Ni mu gihe kandi izava hagati ya Benfica na FC Barcelona izahura n'izava hagati ya Borussia Dortmund na na Lille naho izaba hagati ya FC Bayern Munich na Bayer Leverkusen yo izahura n'izava hagati ya Feyenoord na Inter Milan.

Imikino ya 1/8 ibanza izakinwa tariki ya 4 na 5 naho iyo kwishyura ikinwe tariki ya 11 na 12 z'ukwezi kwa Werurwe.

Iya 1/4 ibanza yo izakinwa tariki ya 8 na 9 naho iyo kwishyura ikinwe tariki ya 15 na 16 Mata, iya 1/2 ibanza ikinwe tariki ya 22 na 30 Mata mu gihe iyo kwishyura yo izakinwa tariki ya 6 na 7 Gicurasi.

Ni mu gihe umukino wa nyuma wo uzakinwa tariki ya 31 Gicurasi i Munich.

Uko amakipe yatomboranye nuko azahura kugeza ku mukino wa nyuma