Nta na kimwe cyo muri Afurika! Ibihugu 10 bisoresha imisoro myinshi ku itabi

Itabi ni kimwe mu binyobwa abantu benshi banywa batitaye ku ngaruka zaryo cyangwa se uburyo rihenzemo. Kubwo kuba ryangiza ubuzima kandi akaba ari nta buryo bworoshye bwo kurikura ku bantu, ibihugu byinshi byafashe gahunda yo kurisoresha amafaranga menshi cyane.

Ibihugu 10 bya mbere ku Isi bisoresha itabi umusoro uri hejuru

1. Bosnia na Herzegovina (mu mwaka wa 2014) Iki gihugu gifite imisoro ihwanye na 85% by’igiciro cy’itabi, kikaba cyarakurikije amabwiriza ya EU yo guca intege kunywa itabi. Politiki yo kuzamura imisoro yatumye abaturage, cyane cyane urubyiruko, bagabanya kunywa itabi.

2. U Bufaransa (mu mwaka wa 2017) mu Bufaransa, imisoro irenga 80% by’igiciro cy’itabi, aho leta yashyizeho gahunda yo kuzamura imisoro buri mwaka mu rwego rwo kugabanya kunywa itabi. Ibi byatumye itabi rihenda cyane, bituma benshi barireka.

3. Israel (mu mwaka wa 2018) Israel yashyizeho imisoro ihwanye na 80% by’igiciro cy’itabi, binyuze muri gahunda yo kuzamura imisoro buri mwaka. Iyi politiki yagize ingaruka nziza, kuko abanywa itabi, cyane cyane urubyiruko, bagiye bagabanuka.

4. Ireland (mu mwaka wa 2018) Ireland yateje imbere gahunda yo kugera ku ntego ya ‘Ireland itarangwamo itabi’ binyuze mu misoro ya 80% by’igiciro cy’itabi. Ibi byatumye kunywa itabi bigenda bigabanyuka kubera igiciro kiri hejuru.

5. U Bwongereza (mu mwaka wa 2019) Mu Bwongereza, imisoro ingana na 77% by’igiciro cy’itabi yatumye kurihaha  bihenda kurushaho nubwo hari abacyemera gukena ariko bakarinywa.

Leta y’u Bwongereza yazamuye imisoro buri mwaka, bigira uruhare rukomeye mu kugabanya umubare w’abanywa itabi.

6. Noruveje (mu mwaka wa 2019) Noruveje yashyizeho imisoro ya 74% by’igiciro cy’itabi, mu rwego rwo kugabanya umubare w’abanywa itabi. Igiciro kiri hejuru cyatumye abantu benshi bahitamo kureka itabi, by’umwihariko mu rubyiruko.

7. Canada (mu mwaka wa 2020) Imisoro yo muri Canada irarenga 70% bitewe n’intara zitandukanye, aho leta yashyize imbaraga mu kuzamura imisoro kugira ngo ibungabunge ubuzima rusange. Ibi byatumye kunywa itabi bigenda bigabanyuka ku rugero rushimishije.

8. Australia (mu mwaka wa 2020) Australia yashyizeho imisoro ingana na 69% by’igiciro cy’itabi, kandi leta izamura imisoro buri mwaka. Ubu itabi ni kimwe mu bihenze cyane ku isi, bituma abantu benshi bareka itabi.

9. Singapore (mu mwaka wa 2021) Singapore ifite imisoro ingana na 67% by’igiciro cy’itabi, kandi leta yahagaritse kwamamaza itabi no kugenzura aho ricururizwa. Iyi politiki ifatanyije n’imisoro myinshi yagize uruhare mu kugabanya abanywa itabi.

10. New Zealand (2022) New Zealand yashyizeho imisoro ya 60% by’igiciro cy’itabi, ifite intego yo guhagarika burundu itabi muri 2025. Igiciro kiri hejuru cyatumye abantu benshi bareka kunywa itabi, biganisha ku gihugu kitazongera kubamo itabi.

Hirya no hino ku Isi, ibihugu byatangiye kuzamura imisoro ku itabi mu bihe bitandukanye, ariko byose bifite intego imwe: kugabanya abanywa itabi no kurengera ubuzima bw’abaturage.

Imisoro yo ku rwego rwo hejuru yagaragaje ko ari kimwe mu bisubizo byiza byo guca intege abarinywa, bityo bigatuma isi igenda iba ahantu hizewe ku buzima bwa bose.

Kunywa itabi bigira ingaruka zikomeye ku buzima, zirimo indwara z’umutima, kanseri y’ibihaha, n’ibibazo by’ubuhumekero. Byongera kandi ibyago byo kwandura indwara zidakira no kuba ikiraro cyiza kiganisha ku rupfu.

Ibihugu byinshi bikomeje kongera umusoro mu rwego rwo guca intege abanywa itabi