Itariki y'ubukwe bwa Darest n'umukunzi we uba muri Amerika- AMAFOTO

Darest yabwiye InyaRwanda ko ubukwe n'umukunzi we buzaba tariki 27 Nzeri 2025, ariko ko bizabanzirizwa n'indi mihango y'ubukwe. Uyu musore yasobanuye ko amaze igihe kinini ari mu rukundo n'uyu mukobwa rwagejeje ku kwiyemeza kubana nk'umugabo n'umugore. 

Mu butumwa aherutse gutambutsa ku rubuga rwa Instagram, Darest yagaragaje umukunzi we nk’impano idasanzwe Imana yamuhaye mu buzima bwe, kandi ashimangira ko ariwe yahisemo gusa.

Ati “Uri impano yihariye nifuzaga kugira. Ntabwo usanzwe buri wese ntiyakugira. Kubana nawe nirwo rukundo. Ntayindi nyongera nkeneye ku isi. Ni wowe nahisemo mu bandi. Undutira ubutunzi bwino ku Isi.”

Darest yakomeje abwira umukunzi we agira ati “Wagize ubuzima bwanjye igitabo cyiza cyo gusoma kandi wanteye inkunga muri buri nguni.” Yavuze ko uyu mukobwa yamwigishije kwiyizera, kandi “Nta wundi nifuzaga kumarana ubuzima bwanjye bwose atari wowe.”

Akomeza ati “Nizere ko tuzabona umwanya wo kubwira abana bacu uburyo inkuru yacu ishimishije. Gufata ukuboko ni ibyanjye ikintu ukunda gukora, nyumva ari ijuru ku Isi.”

Darest aherutse gutangaza ko yafunguye ku mugaragaro inzu ifasha abahanzi mu bya muzika ‘Label’ yise ‘Eeey D Ent’.

Yakoze ibi nyuma y’igihe kinini yumvikanisha ko yatangiye urugendo rw’umuziki we, ariko ashaka no gufasha abandi bahanzi bakiri bato mu ruganda rw’umuziki. Uyu musore yamenyekanye cyane mu itsinda rya Juda Muziki ryasenyutse mu 2023.

Yigeze kubwira InyaRwanda ko yagize igitekerezo cyo gufungura iyi Label agitangira urugendo rw’umuziki nk’umuhanzi wigenga.

Ati “Ni igitekerezo nagize ngitangira kwiririmbana hagamijwe guteza imbere urubyiruko biciye mu muziki kandi ugakorwa mu buryo bwa nyabwo ku kigero cyiza aho ushobora no gucuruzwa ibwotamasimbi.”

Uyu musore yavuze ko ateganya gusinyisha abahanzi muri iyi Label, ahanini binaturutse mu kuba muri iki gihe afite ikipe ngari basigaye bakorana. Kandi azirikana ko aho ageze ari urugendo yashyigikiwemo n’abandi, bityo yifuza gutanga umusanzu we.

Ati “Aho nicaye hose narafashijwe rero nifuza ko naha amaboko abandi bari mu nzira nziza yo kubikora. Hari ibyo turi gutunganya mu minsi iri imbere tuzababwira byinshi kuri iyo gahunda, gusa Abanyarwanda bashonje bahishiwe.”

Da Rest yasobanuye ko icyerekezo cy’iyi Label ni ugufasha abakiri bato mu muziki, kandi bagaharanira ko umuhanzi wese uyinyuzemo ageze ku rwego rushimishije.

Avuga ati “Ni ugukora umuhanzi ushobora kumenyekana muri Afurika kandi ibihangano bye bigacuruzwa mu buryo bwa nyabwo nta ntambwe n’imwe asimbutse.”

Darest yatangaje ko azakora ubukwe n’umukunzi we tariki 27 Nzeri 2025

Darest aherutse kwambika impeta umukunzi we ashimangira paji nshya mu mubano wabo 

Darest agiye kurushinga n’umukobwa usanzwe utuye muri Leta Zunze Ubumwe za Amerika

KANDA HANO UREBE AMASHUSHO Y’INDIRIMBO ‘ONE DAY’ YA DAREST

">