Rayon Sports ishobora kuzafura ikanika mu byondo

 Umuntu yavuga ko iminsi y'ukwabuki imaze gushira kuri komite nshya ya Rayon Sports nyuma y'uko bamaze gutsindwa imikino ibiri yikurikiranya muri uyu mwaka w'imikino ndetse kukaba gutsindwa kwa mbere kuri komite nshya ya Rayon Sports iyobowe na Thaddée Twagirayezu.

Tariki 16 Ugushyingo 2024, nibwo ikipe ya Rayon Sports yatoye komite nshya igomba kuyobora iyi kipe, isimbuye ubuyobozi bwa Uwayezu Jean Fidele. Iyi Komite umuntu yavuga ko yari yatangiye kuyobora ikipe bitari ku mugaragaro kuko Uwayezu yari yasezeye ku mirimo ubwo shampiyona yari igeze ku munsi wa 2 wa shampiyona ndetse itarabona amanota atatu ya shampiyona kuko iyo mikino yose yari imaze kuyinganya.

Komite nshya yaraje ifata ikipe ndetse itangira itsinda Gasogi United ikomerezaho kugera ku mukino w'uminsi wa 15 ubwo yatsindwaga na Mukura ibitego 2-1.

Gufura ukanika mu byondo

Iyo umuntu bamubwiye ngo yafuze yanika mu byondo, biba bishatse kuvuga ko uwo muntu yatangiye akora ibintu neza ndetse abantu bamufitiye icyizere, ariko nyuma ibintu biri kugana ku musozo akaza kubyangiza kandi ubwe ku giti cye.

Abakinnyi ba Rayon Sports ntabwo bakiri mu kibuga

Ubusanzwe umukinnyi ategurwa mu buryo 4 kugira ngo ajye mu kibuga ameze neza. Ubwo buryo ni; gutegura umukinnyi mu buryo bw'imbaraga, kumutegura mu mikinire, ku mutegura mu mayeri yo mu kibuga ndetse no kumutegura mu mutwe. Dufate nk'umukino wa Mukura wavuga ko abakinnyi ba Rayon Sports ibi bintu bine batari babyujuje ndetse ukongeraho n'umutoza wabo.

Abakinnyi ba Rayon Sports wagira ngo bumva Amaradiyo (ibiganiro bya siporo)

Abakinnyi ba Rayon Sports bari bamaze kumva ko nta kipe yabatsinda hano mu Rwanda ndetse bari batangiye kujya guhura n'ikipe bibaza umubare w'ibitego baribuyitsinde dore ko n’itangazamakuru ry’ikipe ryerekaga abakinnyi ko nta kipe ibarenze.

Ibi rero biragoye kuko Rayon Sports ifite abakinnyi batarenze 3 batanga itandukaniro naho abandi bakinnyi bari ku rwego rusanzwe, ibi byageze aho bahura na Mukura basanga yabiteguye ku rwego rudasanzwe birangira ihaguye ndetse bishobora kuzaba bibi kurushaho mu mikino yo kwishyura habaye nta gihindutse.

Amakipe yatangiye kuvumbura ikipe ya Rayon Sports

Urebye umukino wa Mukura ndetse n'umukino Rayon Sports yakinnyemo na Police FC, amakipe yatangiye kumenya imbaraga nke ndetse n'ubushobozi bw'iyi kipe.

Amakipe kuri ubu ari kuza abizi neza ko gufata rutahizamu Ngagne Fall ukamwemeza, ukabuza Ndayishimiye Richard kugeza imipira imbere nibura bihagije kuba Rayon Sports yabura ibisubizo.

Ubuyobozi bwatangiye kuvangira ikipe

Ubuyobozi bwa Rayon Sports burangajwe imbere na Twagirayezu, butangiye kuvangira ikipe kuko bwatangiye gukora ibintu bitajyanye n'ibikorwa n'ikipe ishaka shampiyona.

Twagirayezu uyobora Rayon Sports ugendeye no ku mvugo ze asa naho ikipe ayoboye iri kumusiga 

Buriya biragoye kuba wagarura umukinnyi ku murongo wari wamwemereye ikintu ariko ntukimuhe. Umukinnyi wamuha buri kimwe ariko ntatsinde, gusa bitandukanye no kuba wamwemereye ikintu ariko ntukimuhe. Ubuyobozi bwa Rayon Sports bwageze aho bujyamo ideni ry'amezi abiri abakinnyi ndetse banahembye staff barayibagirwa.

Bamwe mu bakinnyi ba Rayon Sports byumwihariko abanyarwanda, bari kujya mu kibuga bafitiwe amadeni y'amafaranga baguzwe, kandi bamwe mu banyamahanga barahawe amafaranga yabo.

Ibi rero biri guteza abakinnyi kujya mu kibuga batameze neza mu mu twe kandi twabonye ko umukinnyi udateguwe neza mu mutwe niyo waba wamuhaye imyitozo imeze gute byose bihita biba imfabusa.

Abakinnyi nka Ganijuru ndetse na Ishimwe Fiston bari basabwe kuva muri iyi kipe gusa birangira bidakunze, ariko ubu umuntu yakwibaza uburyo Rayon Sports izajya ikinisha umukinnyi yashatse kwirukana nabyo bigacanga abantu.

Ishimwe Fiston na Ganijuru Elie bameze nk'abana bakinira mu mbuga itari iy'iwabo 

Ikindi gituma umuntu avuga ko komite iri kuvangira ikipe, ubu wakibaza ngo isoko niriramuka rishojwe ikipe ya Rayon Sports hari abakinnyi yongeyemo kandi hari abahasanzwe mu ikipe bagitaka amafaranga yabo, ibi bishobora guteza umwuka mubi ndetse watuma kongera kwitangira ikipe bigabanyuka bikaba byatuma ibura igikombe mu mizo ya nyuma.

Urugero twatanga ni kuri Kiyovu Sports ubwo mu 2022 yaguraga abakinnyi Sharaf Eldin Shaiboub Ali kandi abahasanzwe ibafitiye amadeni, byatumye ibura shampiyona iyireba.

Ibi bintu byose rero tubihurije hamwe, twavuga ko Rayon Sports ishobora kuzanika mu byondo byumwihariko abayobozi bayo kuko baje bafatwa nk'abacunguzi ariko aho bigeze rubanda rukaba rwatangiye kubakeka.

Ubundi imikino yo kwishyura niho ubonera ikipe izatwara shampiyona kandi urebye urabona ko Rayon Sports itangiye kwivangira mu gihe uwo bahanganye we yamaze kuva mu bihe bibi ndetse ubu yiteguye imikino yo kwishyura mu buryo budasanzwe.

Bitewe n'urugamba Rayon Sports ifite ntabwo cyari igihe nyacyo cyo kuba yari gutandukana n'umutoza Ayabonga Lebitsa wongereraga imbaraga abakinnyi 

Amakipe yatangiye kuvumbura imikinire ya Rayon Sports kandi isa naho idafite ibisubizo byihuse kuri iki kibazo 

Abafana ba Rayon Sports nyuma yo kubona ubuyobozi bushya akamwenyu kari karagarutse ariko kuri ubu imibare yatangiye kuzamo ibihekane