Rayon Sports yakiriye umukinnyi mushya wakinnye igikombe cya Afurika-AMAFOTO+VIDEO

Uyu mukinnyi ukina asatira anyuze ku ruhande rw'ibumoso akanakina mu kibuga hagati afasha ba rutahizamu gusatira yageze mu Rwanda mu ijoro ryo kuri uyu wa Gatatu akaba yakiriwe n'abarimo umunyamakuru wa Rayon Sports, Nsanzimana Silvester 'Wasiri' ndetse n'umuyobozi w'abafana Claude Muhawenimana.

Innocent Nah Assana yakiniye amakipe arimo Moghreb Atlético Tétouan yo muri Morocco, Colombe Sport y'iwabo, Coton Sports FC nayo y'iwabo yavuyemo mu mpeshyi ya 2024 yerekeza muri Fauve Azur nayo y'iwabo ariko akaba yari yahise atandukana nayo mu kwezi kwa 10.

Uyu mukinnyi wavutse tariki ya 29 z'ukwezi kwa 7 muri 2000 yanakiniye ikipe y'igihugu ya Cameroon y'abatarangeje imyaka 17 muri 2017 ubwo yari mu gikombe cy'Afurika cy'abatarengeje iyo myaka.

Amakuru avuga ko Innocent Nah Assana wakinnanye na Aziz Bassane nawe usanzwe akina muri Rayon Sports, aje kurangiza ibiganiro hagati n'abayobozi b'iyi kipe dore ko we ataje mu igeragezwa.

Murera ikomeje gushaka uko yakwiyubaka dore ko kuri ubu hari abakinnyi babiri bari mu igeragezwa ari bo Ntamba Musikwabo Malick ukomoka muri Repubulika Iharanira Demokarasi ya Congo na Raymond Lolendi Ntaudyimara ukomoka muri Tanzania.

Hari kandi n'Umugande Fahad Bayo Aziz bivugwa ko nawe ari mu biganiro bya nyuma byo kuba yayisinyira ndetse na Bright Anukani ukina mu kibuga hagati afasha ba rutahizamu muri KCCA y'iwabo muri Uganda.

Rayon Sports FC iri gushaka uko isinyisha abandi bakinnyi nyuma y'uko yasoreje imikino ibanza ya shampiyona ku mwanya wa mbere n’amanota 36, irusha atanu APR FC iyikurikiye. 

Iyi kipe yambara Ubururu n'Umweru kandi iri kwitegura imikino y’Igikombe cy’Intwari, aho izahura na Police FC ku mukino wa ½, yakwitwara neza igahura n’izava hagati ya AS Kigali na APR FC.

Innocent Nah Assana agera mu Rwanda 

Aziz Bassane ari mu bagiye kumwakira

Perezida wa bafana ba Rayon Sports n'umunyamakuru wayo 'Wasiri' bagiye kwakira umukinnyi mushya

">