Hamas yatangiye inzira yo guhagarika intambara irekura abagore batatu bari barashimutiwe muri Gaza

Kuwa 19 Mutarama 2025, umutwe wa Hamas warekuye abagore batatu bari barashimuswe, barimo Umwongereza ufite ubwenegihugu bwa Israel, Emily Damari w'imyaka 28, Romi Gonen w'imyaka 24, na Doron Steinbrecher w'imyaka 31. Aba bagore bari bamaze amezi 15 bafungiye muri Gaza, nyuma yo gushimutwa ku itariki ya 7 Ukwakira 2023.

Abarekuwe bashyikirijwe Umuryango Mpuzamahanga wa Croix Rouge (ICRC) mu gace ka Rimal mu burengerazuba bw'umugi wa Gaza.

Amashusho yanyujijwe kuri televiziyo ya Al Jazeera yerekanye imodoka y'umweru itwaye aba bagore igera muri kariya gace, ikurikiwe n'abasirikare ba Hamas bambaye udupfukamunwa n'udutambaro tw'icyatsi ku mitwe, ndetse n'imbaga y'abaturage bafataga amafoto kandi baririmba indirimbo zishyigikira Hamas.

Nk'uko bitangazwa na Channel 12 News yo muri Israel, aba bagore batatu barekuwe bahise bajyanwa guhura n’abana babo i Re’im, mu majyepfo ya Israel, aho imfungwa zinjyanwa nyuma yo gushyikirizwa ku mugaragaro ingabo za Israel

Umuyobozi wa Hamas yemeje ko aba bagore barekuwe mu rwego rwo kubahiriza amasezerano yo guhagarika imirwano. Umuryango wa Croix Rouge watangaje ko aba bagore bameze neza. 

Minisitiri w'Intebe wa Israel, Benjamin Netanyahu, yavuze ko irekurwa ry'aba bagore ari "intambwe y'ingenzi" mu nzira yo kurangiza intambara, yongeyeho ko hakiri byinshi byo gukora kugira ngo habeho amahoro arambye mu karere.

Iri rekurwa ry'aba bagore rije rikurikira ibiganiro byari bimaze igihe hagati ya Hamas na Israel, byagizwemo uruhare n'abahuza barimo Qatar na Misiri, bigamije kugera ku masezerano yo guhagarika imirwano no kurekura imfungwa ku mpande zombi. 

Biteganyijwe ko abandi bagizwe imbohe na Hamas bazakomeza kurekurwa mu minsi iri imbere, mu rwego rwo gushyira mu bikorwa ayo masezerano.

Aba bagore barekuwe bahise bajyanwa guhura n’abana babo i Re’im, mu Majyepfo ya Israel, aha bari bari kuvugana kuri telefoni mu buryo bw'amashisho mbere yo guhura