Ibyo wamenya ku ruzinduko rwa Perezida Kagame muri Leta Zunze Ubumwe z'Abarabu

Iyi nama mpuzamahanga imara icyumweru, yitwa Abu Dhabi Sustainability Week, ikaba iganirirwamo ibikorwa bigamije iterambere rirambye. Mu bizigirwamo harimo no kurebera hamwe uburyo bwo gukoresha ikoranabuhanga rigezweho kugira ngo ritange ejo hazaza heza.

Biteganijwe ko iraza gutangira kuri uyu wa Kabiri tariki 14 Mutarama 2025, ikaba izayoborwa na Perezida wa UAE, Sheikh Mohamed bin Zayed Al Nahyan. Yitabiriwe n’abakuru b’ibihugu bitandukanye, abashinzwe ibikorwa by’igenamigambi, abahanga mu by’inganda no mu ikoranabuhanga.

Kuri uyu wa Kabiri, Perezida Kagame arifatanya na Perezida wa UAE, Sheikh Mohamed bin Zayed Al Nahyan n'abandi bakuru b'ibihugu, abafata ibyemezo, abanyacyubahiro n'abandi bayobozi batandukanye mu gutangiza iyi nama.

Perezida Kagame kandi, ari no mu bakuru b’ibihugu bazatanga ibihembo biyitangirwamo bizwi nka Zayed Sustainability Prize bizaba bitanzwe ku nshuro ya 16, hakazahembwa imishinga mito n'iciriritse, imiryango idaharanira inyungu ndetse n'amashuri yagaragaje udushya n'ibindi bikorwa.

Si ibyo gusa kuko Umukuru w’Igihugu araza no kwifatanya n'abakuru b'ibihugu na guverinoma batumiwe mu kugeza ijambo ku bazaba bitabiriye iyi nama ku munsi wa mbere wayo.

Iyi nama ihuza abayobozi batandukanye ku Isi, ibigo by'ubucuruzi n’imiryango itegamiye kuri Leta, abanyenganda, abahanga, abakora udushya ndetse n’abandi bafatanyabikorwa, mu biganiro biba bigamije gukemura ibibazo byugarije Isi, guteza imbere ingufu no kwihutisha iterambere ry’imibereho myiza mu by'ukungu. 

Perezida Kagame yageze i Abu Dhabi muri Leta Zunze Ubumwe z'Abarabu

Akigerayo yakiriwe na Minisitiri w'Ububanyi n'Amahanga, Sheikh Shakhboot Nahyan Al Nahyan

Yahuye na mugenzi we wa Nigeria, Bola Ahmed Tinubu

Bitabiriye inama izamara icyumweru yiga ku iterambere rirambye