Aba-Rayon bashimiye Amagaju mu buryo bwihariye

Ku Cyumweru, tariki ya 12 Mutarama 2025, mu mukino w’umunsi wa 15 wa Shampiyona y’u Rwanda, Amagaju FC yatsinze APR FC igitego 1-0 mu mukino wabereye mu Karere ka Huye.

Iyi ntsinzi yatumye abafana b’Amagaju ndetse na bamwe mu bakunzi ba Rayon Sports bishimira cyane uko iyi kipe yitwaye ikora intsinzi y’amateka itsinda APR FC.

Ni umukino wabanjirijwe n’amagambo menshi, cyane cyane agaruka ku kuba Rayon Sports yari yaraye itsinzwe na Mukura VS ibitego 2-1. Ariko ibyo ntibyabujije Amagaju FC gushimangira ubushobozi bwayo imbere y’ikipe yari ifite amateka akomeye mu Rwanda.

Umunyezamu w’Amagaju FC, Twagirumukiza Clement, ni umwe mu bakinnyi bagaragaje imbaraga n’ubushake bukomeye muri uyu mukino. Yakoze ibishoboka byose akuramo imipira ikomeye yashoboraga kuvamo ibitego bya APR FC.

Mu kiganiro n’itangazamakuru, Twagirumukiza yagize ati: “Uriya wari umukino ukomeye umukinnyi wese yakwifuza kwitwaramo neza. Nta kidasanzwe nakoze, usibye guharanira kwerekana ko nshoboye. Ndashimira Imana ku mahirwe nahawe yo gukina neza.”

Ibikorwa by’ishimwe ku bakinnyi b’Amagaju FC

Nyuma yo kwitwara neza, bamwe mu bafana ba Rayon Sports bageneye Amagaju FC ubutumwa bw’ishimwe ndetse banafasha bamwe mu bakinnyi bayo ku giti cyabo. Twagirumukiza Clement yavuze ko yakiriye ubutumwa bwinshi bw’abafana bashimangira uko banyuzwe n’uburyo yitwaye mu mukino.

Yagize ati: “Benshi barimo kunyandikira kuri ‘WhatsApp’ no ku bindi bikoresho by’itumanaho, ndetse hari n’abakomeje kohereza amafaranga. Ndabashimira cyane.”

Ndayishimiye Edouard, watsinze igitego rukumbi cyabonetse mu mukino, na we yahawe amafaranga n’abafana bishimira uko yitwaye.

Mu gitondo cyo ku wa Mbere tariki ya 13 Mutarama, Amagaju FC yanahawe inka y’ikimasa n’umwe mu bakunzi b’iyi kipe yo mu Karere ka Nyamagabe nk’ishimwe ridasanzwe ku byo bagezeho.

Iyi ntsinzi y’amateka yatumye Amagaju FC asoza imikino ibanza ya Shampiyona iri ku mwanya wa munani n’amanota 21, mu gihe Rayon Sports iyoboye shampiyona ifite amanota 36.

Uyu mukino wasigiye Amagaju FC ishema rikomeye, ndetse utanga isomo ry’uko guharanira intsinzi bishobora guhindura amateka y’ikipe itekerezwa ko idakomeye.

Umuzamu w'Amagaju Clement umwe mu bashimishije abakunzi ba Rayon Sports ubwo yakuyemo imipira myinshi yatumye APR FC ibura amanota