Umutoza wa Manchester City yatandukanye n'umugore we bari bamaranye imyaka 30

Nk'uko byatangajwe n'ibinyamakuru bitandukanye byo muri Espagne aba bombi bafashe umwanya wo gutandukana burundu mu kwezi kwa 12 k'umwaka ushize wa 2024.

Ni nyuma y'uko bari amaze imyaka 5 baba mu bihugu bitandukanye dore ko muri 2019 Cristina Serra yafashe umwanzuro wo kujya kuba muri Espagne agasiga Pep Guardiola mu Bwongereza. 

Yajyanye n'umwe mu bana babo witwa Valentina aho yari agiye kwita kuri kompanyi yabo y'imideri bafite muri iki gihugu. Aba bombi batangiye gukundana mu 1994 aho bahise banabana gusa muri 2014 ni bwo bakoze ubukwe bwabereye mu gace kari impande y'i Barcelona.

Bafitanye abana batatu ari bo Maria w'imyaka 24, Marius w'imyaka 22 na Valentina w'imyaka 17. Cristina Serra ukomoka muri Brazil akaba asanzwe ari umunyamakuru ndetse n'umwanditsi yagiye agaragara cyane ari kumwe na Pep Guardiola nk'aho muri 2023 yari Instanbul ari gushimira umugabo we wari umaze gutwara igikombe cya UEFA Champions League atsinze Inter Milan ku mukino wa nyuma.

Uyu mutoza yagiye akunda kugaragara byinshi kuri uyu mugore we cyane mu biganiro n'itangazamakuru nk'aho muri 2024 yigeze kuvuga ko ari mwiza ku Isi mu bijyanye n'imyambarire.

Yagize ati: "Umugore wanjye ni mwiza ku Isi mu bintu byinshi, cyane cyane imyambarire. Mu busanzwe arambwira ngo ntukambare ibi cyangwa ngo wambare ibyo nkamwumvira. Ndi umunyabwenge bihagije kugira ngo menye igihe abantu ari beza kundusha ngo nkurikize inama zabo".

Ibi bibaye mu gihe ikipe ya Manchester City itozwa na Pep Guardiola imaze iminsi itameze neza dore ko kugeza ubu iri ku mwanya wa 6 ku rutonde rwa shampiyona aho irushwa amanota 12 na Liverpool ya mbere.

Pep Guardiola yatandukanye n'umugore we bamaranye imyaka 30 

Pep Guardiola yagiye agaragara ari kumwe n'umugore we kenshi