Minisitiri wa Siporo yahuye n’abayobozi ba CAC bari mu Rwanda

Ku wa Mbere tariki 13 Mutarama 2025, Minisitiri wa Siporo, Nelly Mukazayire n’Umunyamabanga wa Leta muri  iyi Minisiteri , Rwego Ngarambe, bakiriye Perezida w’Impuzamashyirahamwe y’Umukino w’Amagare muri Afurika (CAC), Dr. Wagih Azzam, hamwe na Noha Soliman ushinzwe imibanire mpuzamahanga muri iyi mpuzamashyirahamwe. Aba bayobozi bari mu ruzinduko rw’iminsi ine mu Rwanda.

Dr. Wagih Azzam na Noha Soliman bageze mu Rwanda ku wa Gatandatu tariki 11 Mutarama 2025, bakirwa na Perezida w’Ishyirahamwe Nyarwanda ry’Umukino w’Amagare (FERWACY), Ndayishimiye Samson, ndetse na Visi Perezida wa kabiri w’iri shyirahamwe, Kayirebwa Liliane.

Uruzinduko rwabo rufite intego yo kugenzura imyiteguro y’u Rwanda mu kwakira Shampiyona y’Isi y’Amagare, izaba hagati ya tariki ya 21 na 28 Nzeri uyu mwaka. Iyi shampiyona izabera mu mihanda yo mu Mujyi wa Kigali, ikazaba ari inshuro ya mbere yitabiriwe ku butaka bwa Afurika, aho u Rwanda ruzandika amateka mu kuyakira ku nshuro ya 98.

Muri gahunda z’ingenzi z’uru ruzinduko, Perezida wa CAC azatemberezwa mu mihanda izakoreshwa muri iri rushanwa, barebe niba imyiteguro igeze ku rwego rwo hejuru. Iki gikorwa ni ingenzi cyane kuko kigaragaza ubushake n’ubushobozi bw’u Rwanda bwo kwakira ibirori mpuzamahanga bya siporo.

Uruzinduko ruzasozwa ku wa Kabiri, aho aba bashyitsi bazaba barangije ibikorwa byose byari biteganyijwe.

Minisitiri wa Siporo yatangaje ko uru ruzinduko ari umwanya mwiza wo kugaragaza ko u Rwanda rwiyemeje kwerekana ko rushobora kwakira neza Shampiyona y’Isi y’Amagare.

Minisitiri wa Siporo mu Rwanda yahuye na Perezida wa CAC umwe mu baje kureba aho u Rwanda rugeze rwitegura shampiyona y'Isi y'amagare