Ahabanza Imikino

NBA: Indiana Pacers yahagaritse umuvuduko wa Cleveland Cavaliers

Yanditswe na: ISHIMWE Walter
Taliki:13/01/2025 15:19 0

Kuri uyu wa Mbere Indiana Pacers bakoze amateka batsinda Cleveland Cavaliers amanota 108 kuri 93, bahagarika urukurikirane rw'imikino 12 Cavaliers bari bamaze gutsinda mu buryo bw'igitangaza bikurikiranya.

Ikipe ya Cavaliers yari imaze kwerekana imbaraga zidasanzwe muri shampiyona ya NBA, igera ku mwanya wa mbere mu Burasirazuba muri shampiyona kubera intsinzi z'ingenzi ziganjemo izo batsindiye Los Angeles Lakers na Milwaukee Bucks. Nyamara, Indiana Pacers yabaye inzitizi ikomeye ubwo yabatsindaga igahagarika urugendo rwo gutsinda bikurikiranya.

Andrew Nembhard na Pascal Siakam, bahize abandi mu mukino ni bo bagaragaje ko bakwiye iyo ntsinzi. Nembhard yatsinze amanota 19 naho Siakam yongeraho 18, batuma Indiana Pacers igira imbaraga zidasanzwe itsinda umukino.

Cavaliers, bari bafite umusaruro mwiza mu gutsinda amanota atatu (40.3%) uyu mwaka, bananiwe gukomeza urwo rwego, batsinda gusa amanota 11 muri 41 bagerageje (26.8%). Uku kudatsinda amanota kwababereye ikibazo gikomeye mu mukino wabo.

Umutoza wa Cavaliers, Kenny Atkinson, yagaragaje ko igice cya kabiri cyababereye ihurizo. Yagize ati: "Igice cya mbere twakinnye neza cyane mu kwirinda, ariko mu gice cya kabiri ibintu byahindutse. Twatakaje uwo mwuka w’imbaraga mu kwirinda, bituma tudashobora gukomeza kugira imbaraga zidasanzwe.

Ku ruhande rw'abatsinze, Andrew Nembhard yagize ati: "Twakinnye nta cyo twari dutinya kuko twari duhanganye n'ikipe iri imbere muri shampiyona. Twashyize hamwe, dukina dufite intego yo gukomeza gukaza imbaraga mu bwugarizi, kandi tubona umusaruro."

Ikipe ya Cavaliers yari itaratsindwa kuva ku wa 8 Ukuboza. Gutsindwa kwabo kuri Pacers byabaye intangiriro yo kwerekana ko mu kibuga, buri mukino ugira amateka yawo.