Kyle Walker yasabye gutandukana na Manchester City

Walker w’imyaka 34, amaze gutwarana na Manchester City ibikombe byinshi birimo ibya Premier League bitandatu, kimwe cya Champions League n'ibindi byinshi. Nubwo afite ibi bigwi, uyu mwaka w'imikino wabaye mubi kuri we, kuko umwanya wo gukina wagabanyutse, ndetse ntashyirwe mu bakinnyi bari gukina na Salford City mu gikombe cya FA Cup kuri uyu wa Gatandatu.

Nyuma y’uwo mukino ikipe ye yatsinzemo ibitego 8-0, umutoza Pep Guardiola yavuze kuri iki cyemezo cya Walker. Yagize ati: “Iminsi ibiri ishize, Kyle yansabye amahirwe yo kuganira n’abandi bashobora kumushaka. Ni yo mpamvu nahisemo gukinisha abakinnyi bafite ibitekerezo bihamye hano.”

Walker yatangiriye umupira w'amaguru muri Sheffield United mbere yo kwerekeza muri Tottenham Hotspur, aho yamaze imyaka umunani akina ku rwego rwo hejuru. Mu 2017, yagiye muri Manchester City aguzwe miliyoni 50 z’ama-pound, agira uruhare rukomeye mu kugera ku ntsinzi nyinshi iyi kipe yagezeho.

Nubwo Walker afite amateka akomeye muri Manchester City, ashobora gusiga icyuho gikomeye mu bwugarizi bw'iyi kipe. Abakunzi b'umupira w'amaguru bakomeje kwibaza aho azerekeza, niba azakomeza gukina mu Bwongereza cyangwa agashaka amahirwe hanze.

Kyle Walker arifuza gutandukana na Man City