Nottingham Forest yatangiye gutekereza gutwara English Premier League

Ku rutonde rwa shampiyona, aya makipe yombi ari hejuru, kandi uyu mukino uzaba ari uguhatana gukomeye ku rugendo rwo gushaka igikombe cya shampiyona. Ni ibintu bake bari biteze mu kwezi kwa Kanama ubwo shampiyona yatangiraga.

Ikipe ya Nottingham Forest ifitwe n’umutoza Nuno Espírito Santo, iri ku mwanya wa gatatu, ifite amanota 40 mu mikino 20 imaze gukinwa.

Mu mukino iheruka, Forest yaraye itsinze Wolves ibitego 3-0 ku kibuga cya Molineux, ibintu byongereye icyizere mu bafana bayo. Kuri ubu, ikipe iritegura guhura na Liverpool ku wa Kabiri tariki 14 Mutarama, mu mukino ushobora kuba izingiro ryo gutuma Forest itangira kwizera igikombe.

Nuno Espírito Santo uyu mutoza, waje muri Nottingham Forest nyuma yo kurangiza ku mwanya wa 17 umwaka ushize, yagaragaje ubushobozi bwo guhindura byinshi mu mikinire y’ikipe. Mu gihe cy’umwaka umwe gusa, Nuno yatumye Forest iva ku guhangana no kujya mu kiciro cya kabiri, none ubu iri mu makipe ari guhatanira igikombe.

Nuno yavuze ko atibanda ku mwanya ikipe iriho muri shampiyona, ahubwo agashyira imbaraga mu kubaka ikipe ikomeye. Ati: “Turi kugerageza kubaka ikintu cyiza hamwe. Tugomba kwishimira urugendo. Urutonde rwa shampiyona si cyo cy’ingenzi.”

Nottingham Forest ni yo kipe yonyine yabashije gutsinda Liverpool muri shampiyona y’uyu mwaka. Gutsinda Liverpool inshuro ya kabiri bizaba ari ikimenyetso gikomeye cy’ubushobozi bwayo bwo guhatanira igikombe.

Jamie Carragher, wahoze ari myugariro wa Liverpool, yagize ati: “ Nuno Nararamuka itsinze Liverpool, Nottingham Forest izaba iri mu rugamba rw’igikombe kandi byashoboka.”

Nubwo umukino wa Liverpool ari uw’ingenzi, Nuno avuga ko ikipe ye izabanza gushyira imbaraga mu mukino wa FA Cup bazakina na Luton, ngo abakinnyi babone amahirwe yo kwitoza no kugira igihe cyo gukina.

Abafana ba Nottingham Forest bifuza kubona ikipe yabo igaruka mu marushanwa ya Champions League bwa mbere kuva mu mwaka w’imikino wa 1995-1996. 

Forest iri imbere ya Newcastle n’amanota atandatu imbere ya Manchester City. Morgan Gibbs-White, umukinnyi watsinze igitego cya mbere mu mukino na Wolves, yavuze ko ari inzozi ku ikipe kugaruka ku rwego mpuzamahanga.

Morgan Gibbs-White yagize ati: “Gukina Champions League byaba ari igitangaza. Abafana bamwe bashobora kuba barigeze kubibona, kandi kubibaha bwa kabiri ni intego dufite nk’ikipe.”

N’ubwo urugendo rwo kugera ku gikombe cya shampiyona cyangwa kugaruka mu marushanwa akomeye nka Champions League rukiri rurerure, Nottingham Forest irerekana ko ishobora gukora amateka akomeye. Umutoza Nuno Espírito Santo na bagenzi be bafite intego yo gukomeza kuzamura ikipe, ikagera ku rwego rushimwa n’abantu benshi.

Nottingham Forest izakina umukino ukomeye na Liverpool, ariko icy’ingenzi kuri iyi kipe ni ugukomeza kugaragaza ko ifite ubushobozi bwo guhatanira ibikombe, no gushyira amateka mashya ku izina ryayo.

Mu ikipe ya Nottingham Forest batangiye gutekereza igikombe