Agatama katumye Umupolisi Mukuru arekura imfungwa ngo zijye kurya Ubunani

Umupolisi Mukuru wo mu gihugu cya Zambia wari wasinze, yafashe icyemezo cyo kurekura abantu 13 bari bafungiye kuri stasiyo ya polisi ya Leonard Cheelo, iri mu murwa mukuru Lusaka, kugira ngo babashe kwizihiza umunsi mukuru w'Ubunani.

Umupolisi mukuru Titus Phiri yatawe muri yombi nyuma yo kurekura abantu 13 bakekwaho ibyaha, bakaba bari bafungiye kuri stasiyo ya polisi.

Inkuru dukesha BBC, ivuga ko abarekuwe bari bafungiye ibyaha bitandukanye birimo gukubita no gukomeretsa, ubujura no kwinjira mu nzu y'undi mu buryo bunyuranyije n'amategeko.

Nyuma y'uko Phiri ategetse ko abo bantu bagenda, yavuze ko bafite uburenganzira bwo kwishimira umwaka mushya bari kumwe n'imiryango yabo.

Umuvugizi wa Polisi ya Zambia, Rae Hamoonga, yavuze ko Phiri yari yasinze, igihe yatse ku ngufu imfunguzo za gereza z’abagabo na gereza y’abagore.

Uyu mupolisi mukuru yaje gutabwa muri yombi nyuma y'uko abashinzwe gukurikirana umutekano babonye ko 13 muri 15 bari bafungiye kuri stasiyo ya polisi batorotse.

Phiri nta jambo aratangaza, gusa ari gukurikiranwa ndetse igikorwa cyo gushakisha abo yarekuye kirakomeje.

Ibi byabaye nyuma y'igihe kinini, aho ikibazo cyo kurekura abantu bakekwaho ibyaha gisa n'ikintu cyagiye kigaragara mu mateka ya Zambia.

Dickson Jere, wahoze ari umuvugizi wa Perezida akaba n'umunyamategeko, yanditse ku rubuga rwa Facebook ko ibi byabayeho mu buryo butunguranye kandi bisekeje, ariko yibutsa ko ibintu nk'ibi byabayeho mu 1997, ubwo uwari umucamanza Kabazo Chanda yategekaga ko abantu 53 bakekwaho ibyaha bafungurwa.

Umwanditsi: KUBWIMANA Solange