FERWAFA yiteguye gushyiraho abatoza bahoraho mu byiciro bitandukanye by’Amavubi

Iyi gahunda izakorwa uyu mwaka wa 2025, ikazibanda cyane ku makipe y’ingimbi, ay’abagore ndetse no ku batoza bungirije b’Amavubi.

Ubusanzwe, mu ikipe y’Igihugu y’Amavubi, umutoza mukuru ni we ugira amasezerano ahoraho, mu gihe abamwungirije bakoraga nk’abanyakiraka badafite amasezerano ahamye. Ibi byatumaga imikorere y’abungirije iba idahoraho kandi itandukanye n'iy'umutoza mukuru. Icyakora, iyi gahunda nshya izahindura ibintu ku buryo abungirije bazahabwa amasezerano ahoraho kimwe n’umutoza mukuru.

Nk'uko Perezida wa FERWAFA yabigarutseho mu kiganiro yagiranye na B&B Kigali FM, iki cyemezo kizongerera abatoza umwanya wo gukurikirana imikino ya shampiyona y’imbere mu gihugu, bigatuma bahamagara abakinnyi bafite impano n’imyitwarire ikwiye mu makipe y’Igihugu kuko bazaba babazi neza.

Ku rundi ruhande, ikipe y’Igihugu y’Abagore nayo izabona umutoza ufite amasezerano ahoraho. Uyu mwanzuro uzafasha mu kuzamura urwego rw’imikinire, kandi uzashyigikira gahunda yo kwita ku mpano nshya mu mupira w’amaguru w’abagore mu Rwanda.

Si abatoza b’ikipe y’Abagore gusa bazungukira muri iyi gahunda, kuko n’amakipe y’abato (ingimbi) nayo azabona abatoza bahoraho. Ibi bizafasha mu gutegura urubyiruko no kurushaho kwita ku mpano z’abakinnyi bakiri bato, bikazamura icyizere cy’ejo hazaza h’umupira w’amaguru mu Rwanda.

Gushyira abatoza bahoraho mu byiciro byose by’Amavubi bizatuma umupira w’amaguru mu Rwanda urushaho gutera imbere. Bizatanga amahirwe yo kubaka ikipe zifite umusingi uhamye, bigatuma u Rwanda rushobora guhangana ku rwego mpuzamahanga.

FERWAFA igiye gushyiraho abatoza mu byiciro bitandukanye mu Amavubi

Ikipe y'igihugu y'abagore nayo izagira abatoza bafite amasezerano ahoraho