Alisson Becker yasabye bagenzi be muri Liverpool gukora amateka mashya bagatwara Premier League

Liverpool iri ku mwanya wa mbere ku rutonde rwa shampiyona, ifite amanota atandatu irusha ikipe ya Arsenal iri ku mwanya wa kabiri, kandi ifite umukino umwe itarakina. Mu gihe ikipe itozwa na Slot igaragaza imbaraga zidasanzwe, Alisson yibukije bagenzi be ko intego atari ukwibanda ku mateka y’ibyashize, ahubwo ari ukureba imbere no gukora ibyiza birenzeho.

Alisson, w’imyaka 31, ari mu bakinnyi bafashije Liverpool gutwara igikombe cya Premier League mu 2019-20, yari imaze imyaka 30  itazi uko gisa. Icyo gihe ikipe yari iyobowe na Jurgen Klopp, yanatwaye n’igikombe cya Champions League mu mwaka wawubanjirije.

Alisson Becker  yagize Ati "Iyo kipe yacu yari idasanzwe.Twageze ku ntsinzi nyinshi, ariko ubu dufite amahirwe yo gukora amateka mashya. Dufite ikipe nziza, ikorana umurava n’ubwitange bwose bukenewe kugira ngo tugere ku ntsinzi. Ni ngombwa guharanira gukora ibyiza birenze ibyo twagezeho mbere."

Ikipe ya Liverpool yahinduye byinshi mu mikinire yayo kuva Slot yagera ku buyobozi avuye muri Feyenoord mu mpeshyi. Slot yazanye uburyo bushya bushingiye ku kugumana umupira igihe kirekire no gukina umukino ugerageza gucunga neza amahirwe no kuyabyaza umusaruro. Alisson yavuze ko ubu buryo butandukanye cyane n’ubwakoreshwaga ku bwa Klopp, aho ikipe yakinaga umupira wihuta, ugendera ku ihindagurika no ku muvuduko mwinshi.

Ikigaragara kandi ni uko iyi kipe yagaragaje ubushobozi bwo guhuza abakinnyi bashya n’abasanzwe. Abakinnyi b’inararibonye nka Trent Alexander-Arnold, Virgil van Dijk, na Mohamed Salah, bakomeje gutanga umusaruro ushimishije, bakaba barasanganwe igikombe cya 2019-20. Abashya barimo Alexis Mac Allister, Dominik Szoboszlai, na Ryan Gravenberch mu kibuga hagati, hamwe na Cody Gakpo na Darwin Nunez mu busatirizi, nabo bagaragaje ko bahangana n’amakipe akomeye.

Liverpool irakina na West Ham kuri iki Cyumweru, aho intego ari ukongera intera iri hagati yayo na Arsenal. Alisson yongeye gushimangira ko bategereza ko umwaka wa shampiyona urangira kugira ngo basuzume ibyo bagezeho.

Alisson Becker  yakomeje agira ati "Tugomba kureba imbere, ntitukishingikirize amateka y’ahashize. Ikipe yacu iri mu mwanya mwiza, kandi dufite ubushobozi bwo gukora amateka mashya. Ntidushaka gukomeza kugereranywa n’amakipe yabanje, ahubwo dushaka gukora ibidasanzwe ku buryo twibukwa mu buryo bwihariye."

Umuzamu wa Liverpool yasabye bagenzi be kwitwararika bakazatwara igikombe cya shampiyona y'u Bwongereza