Arsenal yagiriwe inama yo kugura Alexander Isak niba ishaka igikombe

Mu nyandiko ye yasohotse kuri BBC Sport, Deeney yashimye cyane Isak, amuha umwanya mu ikipe y’Icyumweru ya Premier League mu kiganiro Match of the day. Yagize ati: “Isak ubu ni rutahizamu mwiza kurusha abandi muri Premier League. Arsenal, mwamugura gusa, mugatwara igikombe, nta bindi bikenewe.”

Nubwo Deeney agaragaza icyizere cy’uko Isak yaba umuti wa Arsenal, kumubona biragoye cyane kuko Newcastle United imushakaho akayabo k’amapawundi Miliyoni 100, kandi uko akomeza kwitwara neza, ni na ko iki giciro cyiyongera. Ibi bishobora kubuza Arsenal amahirwe yo kumusinyisha muri Mutarama, igihe isoko ry’igura n’igurisha rizaba rifunguye.

Alexander Isak w’imyaka 24, ni umwe mu bakinnyi bafite impano idasanzwe muri Premier League. Muri uyu mwaka w’imikino, uyu Munyasuwede amaze gutsinda ibitego 12 mu mikino 19 yose yakinnye mu marushanwa atandukanye. 

Ubuhanga bwe mu gutsinda ibitego, kwihuta, byatumye aba umwe mu bakinnyi b’ingenzi muri Newcastle United, ikomeje kwigaragaza nk’imwe mu makipe akomeye.

Deeney yatanze urugero rw’uburyo Isak yakomeza guhindura byinshi mu mikino ya Arsenal, avuga ko uyu mukinnyi afite ubushobozi bwo gutwara ibikombe mu gihe yahawe urubuga rwo gukina ku rwego rwo hejuru.

Arsenal ifite intego yo guhatanira ibikombe muri uyu mwaka, ariko imbogamizi z’ubusatirizi bucye zagaragaye cyane muri shampiyona y’uyu mwaka w’imikino. Mu gihe Gabriel Jesus na Kai bagaragaza intege nke mu gucungura ikipe mu bihe bikomeye, Isak yaba igisubizo gikomeye.

Ubuyobozi bwa Arsenal n’umutoza Mikel Arteta bafite inshingano yo gufata icyemezo gikomeye mu isoko ryo kugura abakinnyi, niba koko bifuza guhatanira igikombe cya shampiyona y’uyu mwaka.

Alexander Isak ntabwo ari rutahizamu usanzwe. Uretse ubushobozi bwo gutsinda ibitego, afite n’uburyo bwo gufasha bagenzi be mu kibuga no guhindura umukino mu gihe ikipe ye iri mu kaga hagati. 

Mu gihe Arsenal yatekereza kumugura, byashimangira ubushake bwayo bwo kongera kwegukana Premier League kuva mu 2004.

Arsenal yagiriwe inama yo kugura Isaak kugira ngo igume guhanganira ibikombe