Brazil: Abagore batatu bapfuye nyuma yo kurya cake ya Noheli mu gikorwa cyo kwishimana n'umuryango

Abagore batatu bapfuye ni Tatiana Denize Silva dos Anjos, w'imyaka 43, Maida Berenice Flores da Silva, w'imyaka 58, na Neuza Denize Silva dos Anjo, w'imyaka 65.

Barwaye bikomeye nyuma yo kurya iyo cake, yari yarakozwe na Maida hamwe Zeli Terezinha Silva dos Anjos, mu rwego rwo kwizihiza Noheri hamwe nk'umuryango nk'uko byari bisanzwe.

Inkuru dukesha ikinyamakuru The Sun ivuga ko, Tatiana na Maida bapfuye kuri uwo munsi baririyeho iyo cake, naho Neuza apfa ku munsi ukurikiyeho, aho yapfiriye my bitaro. 

Zeli, wari wariye uduce tubiri twa cake, niwe wabanje kujyanwa mu bitaro, akaba ameze neza ubu. Umwana w'umuhungu w'imyaka 10 nawe wariye kuri iyi cake, nta ngaruka zikomeye cyane byamugizeho, kuko yahise ajyanwa kwa muganga ariko akomeje kugira uburibwe.

Umuryango wari wahuriye hamwe kugira ngo banezerwe basangira kandi bishimira Noheli, nk'uko bari basanzwe babikora buri mwaka, ariko uwo munsi w'ibyishimo wahindutse igihombo gikomeye. 

Polisi iri gukora iperereza ku mpamvu zihishe inyuma y'izi mpfu, aho amakuru y'ibanze agaragaza ko ibiribwa byakoreshejwe mu gukora iyo cake, birimo mayonesse n'ibindi bicuruzwa bishobora kuba byari byararengeje igihe. 

Amatembabuzi y'umweru yabonetse ahabereye ibi, ari gusuzumwa kugira ngo hamenyekane niba hari uruhare yagize muri izi mpfu.

Polisi kandi yagarutse ku kibazo cy'urupfu rw'umugabo Zeli, wapfuye mu kwezi kwa Nzeri bivugwa ko yazize uburwayi bushobora kuba bwaratewe n'amarozi. Hakomeje kandi gukorwa iperereza ryimbitse kuri iki kibazo.

Tatiana Denize Silva Dos Anjos w'imyaka 43 yapfuye nyuma yo kurya iyo cake

Neuza Denize Silva Dos Anjos w'imyaka 65 yajyanywe mu bitaro byihutirwa nyuma yo kurya iyo cake, ari naho yaje gupfira

Maida de Bernice de Froles da Silva w'imyaka 58 nawe yapfuye azize iyo cake

Cake ya Noheri yateje impfu eshatu z'aba bagore bo mu muryango umwe

Umwanditsi: KUBWIMANA Solange