Urugendo rwa Louise Mushikiwabo, Umuyobozi w’Intangarugero

Madamu Louise Mushikiwabo yavutse ku itariki ya 22 Gicurasi 1961 i Kigali, mu Rwanda. Ni we muto mu bana icyenda bavukana ku babyeyi be Bitsindinkumi na Nyiratulira. Yakuriye mu Rwanda, ari na ho yize amashuri abanza n’ayisumbuye.

Nyuma y’aho, yaje kujya kwiga muri Kaminuza Nkuru y’u Rwanda i Butare, aho yakuye impamyabumenyi y’icyiciro cya kabiri cya kaminuza mu rurimi rw’Icyongereza mu 1984. 

Nyuma yo kurangiza muri kaminuza y’u Rwanda, yagiye muri Leta Zunze Ubumwe za Amerika, muri Kaminuza ya Delaware, aho yakuye impamyabumenyi y'icyiciro cya gatatu cya kaminuza mu ndimi n’ubusobanuzi mu mwaka wa 1988.

Louise Mushikiwabo uvuga adategwa indimi zirimo Igifaransa, Icyongereza n'Ikinyarwanda. Mu 2006, yanditse igitabo cyitwa “Rwanda Means the Universe”, kikaba cyaravugaga mu buryo bwumvikana ku mibereho ye, ku nkuru y’umuryango we, n’uburyo yamenye inkuru y’ubuzima bwa Jenoside yakorewe Abatutsi mu 1994 mu Rwanda. 

Icyo gitabo kirimo ibitekerezo n’ubuhamya bw’umugore w’imbaraga, wiyemeje gukora ibishoboka byose kugira ngo asigasire igihango cy’ubuzima, amahoro n’ubumwe bw’u Rwanda.

Mushikiwabo yamenyekana ku rwego mpuzamahanga kubera uburyo yagiye ashyira imbere ibitekerezo by’iterambere ry’akarere no gushyigikira gahunda zo guteza imbere uburezi n’ubukungu.

Mu 2006 nanone, yagiye gukorera Banki Nyafurika Itsura Amajyambere (AfDB) nk'Umuyobozi w’Itangazamakuru. Yakoze ibikorwa by’ubukangurambaga byo guteza imbere umuco no gukangurira ibihugu bigize AfDB gufatanya mu guteza imbere amajyambere arambye.

Muri iki gihe, yabaye umwe mu bayobozi b’ingenzi muri ibyo bikorwa byo guhuriza hamwe ibitekerezo n’imbaraga mu gutegura gahunda zifite akamaro ku baturage b’akarere.

Nyuma y’ibi, Louise Mushikiwabo yagarutse mu Rwanda mu 2008, aho yashyizweho na Perezida wa Repubulika aba Minisitiri w’Itangazamakuru. Muri uyu mwanya, yagiye ashyira imbere gahunda yo guhindura isura y’itangazamakuru ryo mu Rwanda ndetse no kugiriramo uruhare mu gushyira mu bikorwa politiki y’iterambere ry’uburezi, umuco, n’ubukungu.

Mu 2009, yaje kuba Minisitiri w’Ububanyi n’Amahanga n’Ubutwererane, aho yashyize imbaraga mu kubaka ibikorwa by’ubukungu no kugirirana ubufatanye bwiza n’ibihugu by’Afurika ndetse n’andi mahanga. Ibyo bituma u Rwanda rukomeza kugira umwanya wihariye ku rwego mpuzamahanga.

Mu mwaka wa 2019, Louise Mushikiwabo yatorewe kuba Umunyamabanga Mukuru w’Umuryango Mpuzamahanga w’Abavuga Ururimi rw'Igifaransa (OIF). Akaba yarabaye umugore wa mbere watorewe uyu mwanya.

Muri 2021 Louise Mushikiwabo yavuze imbwirwaruhame mu nama y’Umuryango w’Abibumbye agaragaza akamaro k’ururimi rw’igifaransa. Ibi bigaragaza uruhare rwe mu guteza imbere abavuga urwo rurimi nk’uko ari n’inshingano ze.

Uyu muyobozi nanone, yagaragaje uruhare runini mu kubungabunga amahoro cyane cyane muri Afurika. Aho nk’urugero mu Ugushyingo 2021, yagize uruhare muri gahunda yo kubaka amahoro muri Mali igihe icyo gihugu cyari mu bibazo bitoroshye bya politiki.

Ibikorwa bye bitandukanye byagiye bigira ingaruka nziza ku buzima bw’abaturage bo mu bihugu bitandukanye by’Afurika n’ahandi ku isi, bityo bituma igihugu cy'u Rwanda cyakira amashimwe ku rwego mpuzamahanga.

Louise Mushikiwabo ni umugore w’intangarugero, w’umudiplomate ufite icyizere mu iterambere ridaheza, ku ruhando mpuzamahanga. Inzira y’imikorere ye yatanze icyizere ku gihugu, ndetse no ku bihugu bimwe na bimwe muri Afurika.

Umunyarwandakazi Madamu Louise Mushikiwabo ari mu bayobozi bakomeye ku Isi

Umwanditsi: RWEMA JULES ROGER