Perezida Kagame yahaye imbabazi abarimo Bamporiki Edouard: Iby’ingenzi byaranze umwaka wa 2024 mu butabera

Raporo ngarukamwaka iheruka gukorwa ku iyubahirizwa ry’amategeko, yashyize u Rwanda ku mwanya wa mbere mu bihugu 34 bigize agace ka Afurika yo Munsi y’Ubutayu bwa Sahara, mu gihe Repubulika Iharanira Demokarasi ya Congo yaje mu myanya ya nyuma ku rwego rw’Isi.

Iyo raporo inzwi nka “World Justice Project Rule of Law Index” ikora urutonde hagendewe ku buryo inzego z’ubuyobozi zishyirwaho, kuba hatarangwa ruswa, Guverinoma idaheza, uburenganzira bw’ibanze,umutekano n’ituze by’abaturage, iyubahirizwa ry’amategeko, ubutabera ku baturage ndetse n’ubutabera ku banyabyaha.

Iy’umwaka wa 2023 igaragaza ko u Rwanda ruri mu bihugu mbarwa, aho ibipimo by’iyubahirizwa ry’amategeko byazamutse. Mu bihugu 144 byakorewemo ubushakashatsi, ibigera kuri 59% amanota yabyo yaragabanutse ugereranyije n’umwaka ushize.

Ibi byatumye mu bijyanye n’iyubahirizwa ry’amategeko ku rwego rw’Isi u Rwanda ruza ku mwanya wa 41 mu bihugu 142 byakorewemo ubushakashatsi.

Bimwe mu byaranze urwego rw’ubutabera mu 2024:

Uyu mwaka Perezida wa Repubulika Paul Kagame ku bw’ububasha ahabwa n’amategeko, yahaye imbabazi abagororwa basaga 200. Muribo harimo Emmanuel Gasana wari Guverineri w’Intara y’i Burasirazuba ndetse na Bamporiki Edouard wari Umunyamabanga wa Leta muri Minisiteri y’Urubyiruko.

CG (Rtd) Gasana Emmanuel, yari yakatiwe gufungwa imyaka itatu n’amezi atandatu n’ihazabu ya miliyoni 36Frw nyuma yo kumuhamya icyaha cyo gukoresha ububasha ahabwa n’amategeko mu nyungu ze bwite.

Mu gihe Bamporiki Edouard yari yakatiwe igifungo cy’imyaka itanu, akanatanga n’ihazabu ya miliyoni 30Frw n’urukiko rukuru nyuma yo guhamwa n’ibyaha bya Ruswa.

Ni ibintu Umuvugizi wungirije wa Guverinoma y’u Rwanda, Me Alain Mukurarinda yasobanuye avuga ko kuba hari abahawe imbabazi bidakuyeho ko bakongera gukurikiranwa baramutse basubiye mu byaha.

Tariki 3 Ukuboza uyu mwaka kandi, Perezida wa Repubukika Paul Kagame yashyize Madamu Domitilla Mukantaganzwa ku mwanya wa Perezida w’Urukiko rw’Ikirenga naho Alphonse Hitiyaremye agirwa Visi Perezida w’Urukiko rw’Ikirenga.

Ubwo yarahiriraga izi nshingano, Domitilla Mukantaganzwa yavuze ko agiye gukomereza aho abo yasimbuye bagejeje mu rwego rwo gushakira ibisubizo bimwe mu bibazo bikigaragara mu Rwego rw’ Ubutabera.

Mukantaganzwa Domitilla yagizwe Perezida w’Urukiko rw’Ikirenga asimbuye Dr. Ntezilyayo Faustin, mu gihe Alphonse Hitiyaremye agirwa Visi Perezida w’Urukiko rw’Ikirenga yasimbuye Mukamulisa Marie-Thérèse.

Ubushinjacyaha bukuru bw’u Rwanda bwagaragaje ko kimwe cya kabiri cy’abakurikiranyweho ibyaha mu Rwanda bafite hagati y’imyaka 18 na 30. Bwagaragaje ko kandi icyaha cy’Ubujura ndetse n’icyo gukubita cyangwa gukomeretsa ku bushake ari byo biza ku isonga mu nkiko z’u Rwanda.

Mu mwaka ushize w’Ubucamanza, Inkiko z’u Rwanda zakiriye dosiye 21.326 z’ibyaha by’ubujura. Mu gihe icyaha cyo gukubita no gukomeretsa ku bushake muri 2023/2024, Inkiko z’u Rwanda zakiriye dosiye za cyo 11.571.

Mu mwaka w'Ubucamanza wa 2023/2024, umubare w’imanza zaciwe wiyongereye ku kigero cya 44% ugereranyije n’imyaka itanu ishize kuko zavuye kuri 76.346 mu 2019/2020, zigera kuri 109.691 mu 2023/2024. Dosiye zakirwa n’Ubushinjacyaha zariyongereye ku kigero kiri hejuru kuko guhera mu 2017/2018 zavuye ku 43.226, zigera ku 90.079 mu 2023/2024.

Muri uyu mwaka, Igihugu cy’u Bufaransa cyashyize imbaraga nyinshi mu kugeza mu nkiko abagize uruhare muri Jenoside yakorewe Abatutsi ndetse n’abagaragaweho ingengabitekerezo ya Jenoside. Muri aba, harimo Hategekimana Philippe Manier uzwi nka Biguma, Dr. Eugène Rwamucyo Charles Onana, Dr. Venant Rutunga n’abandi.

Muri uku kwezi k’Ukuboza kandi, nibwo urukiko rwa Gisirikare rwahamije Sgt Minani Gervais ibyaha yari akurikiranyweho, rumuhanisha igifungo cya burundu no kunyagwa amapeti ya gisirikare. Ni nyuma yo kumuhamya ibyaha 3 birimo kurasa atabiherewe uburenganzira n’umukuru, ubwicanyi buturutse ku bushake no kwiba, kwangiza no kuzimiza igikoresho cya gisirikare.

Ni ibyaha yakoze tariki 13 Ugushyingo 2024, ubwo yarasiraga mu kabari, abaturage 5 bo mu Kagari ka Rushyarara, mu Murenge wa Karambi, Akarere ka Nyamasheke.

Bamporiki na Gasana mu bahawe imbabazi na Perezida Kagame 

Sgt Minani Gervais yakatiwe igifungo cya burundu