Amarangamutima ya Lionel Messi wizihiza imyaka ibiri yegukanye igikombe cy'Isi

Uramutse ubaze umunsi ku munsi, kuri uyu wa Gatatu taliki ya 18 Ukuboza 2024, imyaka ibiri irashize ikipe y'igihugu ya Argentine itwaye igikombe cy'Isi cya 2022 cyaberaga muri Qatar. 

Iyi kipe y'igihugu yagitwaye itsinze u Bufaransa ku mukino wa nyuma hifashishijwe penariti nyuma y'uko umukino wari warangiye amakipe yombi anganya ibitego 3-3.

Kapiteni w'ikipe y'igihugu ya Argentine, Lionel Messi byari ibihe bidasanzwe kuri we dore ko ibindi bikombe bikomeye byose yari yarabitwaye ariko ari cyo gisigaye.

Uyu mukinnyi ubitse Ballon d'Or 8 abinyujije ku mbuga nkoranyambaga ze, kuri uyu wa Gatatu yashyizeho ifoto ari kumwe n'igikombe cy'Isi maze avuga ko Ukwezi k'Ukuboza ari ibihe akunda ndetse anifuriza abafana be isabukuru nziza y'imyaka ibiri acyegukanye.

Yanditse ati: "Nkunda Ukuboza n’ibihe bya Noheli. Imyaka ibiri ishize byashoboraga kuba ukwezi kwa nyuma kw’umwaka kuri njye kuryana, ariko byarangiye ari ko kwezi kwiza kuruta andi yose mu mwuga wanjye w’imikino. Ubu, buri Ukuboza iki gitekerezo kiragaruka… Isabukuru Nziza y’Imyaka ibiri kuri mwese!”.

Kuri ubu Lionel Messi ari mu biruhuko nyuma yuko ikipe ye ya Inter Miami yasoje imikino ya shampiyona ikaba izagaruka mu mwaka utaha.

Lionel Messi arizihiza isabukuru y'imyaka ibiri yegukanye igikombe cy'Isi 

Lionel Messi yavuze ko akunda ukwezi k'Ukuboza yatwayemo igikombe cy'Isi