Mukantaganzwa uherutse kugirwa Perezida w’Urukiko rw’Ikirenga yagaragaje umuti w’ubwinshi bw’imanza mu nkiko

Nyuma y'uko agizwe Perezida mushya w'Urukiko rw'Ikirenga, Domitilla Mukantaganzwa yatangaje ibyihutirwa agiye guheraho muri izi nshingano, avuga ku bwumvikane, nk'umuti abona wakemura ikibazo cy'ubwinshi bw'imanza ziri mu nkiko.

Mu butumwa bwe yagize ati: "Ubwinshi bw'ayo madosiye kubukemura si ikindi, kubukemura ni no kubanza kumenya ayo madosiye ari mu bihe byiciro hashingiwe ku cyarezwe. Icyarezwe rero, cyane cyane navuga nk'ibyaha byo mu rwego mbonezamubano. Izo ni imanza ushobora gufasha ababuranyi kumvikana. Yemwe mu manza mpanabyaha na ho hari ibyaha bibaho ushobora gukoresha icyo nagereranya no kumvikana; kumvikanisha uwakoze icyaha n'uwagikorewe, nabyo bikaba byakwihutisha ubutabera.

Yakomeje agira ati: "Kugira ngo rero ubwo bwinshi bw'amadosiye cyangwa ubw'imanza bukemuke, ni uko umuntu abanza kumenya ayo madosiye ni ayahe, ari mu bihe byiciro? Kuko nta dosiye isa n'indi, nta n'iba ifite uburemere bumwe n'indi."

Mukantaganzwa yagaragaje ko uburemere bw'amadosiye buba butandukanye kuko hari iba yororshye hakaba n'indi isaba ubushakashatsi, akomoza ku ngamba abona ishobora gutanga umusaruro urambye ayihuza na Politiki u Rwanda rwafashe ishyize imbere ubwumikane bw'Abanyarwanda.

Ati: "Ni ingamba yo gufatanya n'izindi nzego, abaturage bakigishwa ko gukemura ibibazo unyuze mu nkiko atari bwo buryo bwonyine bafite."

Mu byo agiye guheraho mu nshingano nshya aherutse guhabwa, harimo gufatanya n'abandi gushaka ibisubizo by'ibibazo bizwi birimo n'iki cy'ubwinshi bw'amadosiye ari mu nkiko, ikibazo cy'ubuke bw'abakozi, ikibazo cyo kutanyurwa aho abenshi binubira kutabona ubutabera bukwiye n'ibindi.

Umuhango wo kurahira kwa Perezida w'Urukiko rw'Ikirenga, Domitilla Mukantaganzwa na Visi Perezida w'Urukiko rw'Ikirenga, Alphonse Hitiyaremye, wabereye mu Ngoro y’Inteko Ishinga Amategeko, kuwa Kane, tariki ya 12 Ukuboza 2024.

Ubwo yarahiraga, Domitilla Mukantaganzwa yijeje Perezida Kagame ko inshingano bahawe bazazubahiriza neza.

Ati: “Turabizeza ko inshingano mwaduhaye tuzumva neza kandi ko tuzaharanira kuzikora uko bikwiye. Tuzaharanira guha Abanyarwanda ubutabera kandi butanzwe mu gihe gikwiye. Tuzakora uko dushoboye kugira ngo ubutabera dutanga burusheho kugirirwa icyizere.”

Mukantaganzwa yavuze ko Urwego rw’Ubutabera mu Rwanda hari intambwe nziza rwateye nyuma ya Jenoside yakorewe Abatutsi ariko hakiri byinshi bikeneye kugerwaho n’ibikeneye kunozwa bityo we na Visi Perezida bazaharanira ko bigerwaho.

Ati: “Duharanira uko ubudakemwa, kubazwa inshingano no gukora umurimo unoze bishinga imizi byose mu nyungu z’ubutabera bubereye u Rwanda.”

Perezida w’Urukiko rw’Ikirenga mushya, Domitilla Mukantaganzwa, afite imyaka 60. Mbere y’izi nshingano yari Umuyobozi wa Komisiyo y’Igihugu ishinzwe Ivugurwa ry'Amategeko, kuva mu Kuboza 2019.

Amaze imyaka igera kuri 30 akora mu bijyanye n’amategeko mu nzego zitandukanye, aho yabaye Umunyamabanga Nshingwabikorwa w'Inkiko Gacaca akaba yaranabaye Komiseri muri Komisiyo ishinzwe kwandika Itegeko Nshinga n’andi mategeko. 

Mukantaganzwa Domitilla yagaragaje iby'ibanze agiye guheraho mu nshingano nshya nka Perezida w'Urukiko rw'Ikirenga, yumvikanisha ko ashyize imbere ubwumvikane bw'Abanyarwanda

Ubwo yarahiriraga izi nshingano, yijeje Abanyarwanda ubutabera bwuzuye