Sonia Rolland yagizwe Nyampinga w’u Bufaransa! Ibyaranze uyu munsi mu mateka

Ibintu biba byarabaye kuri iyi tariki mu myaka yashize ni byinshi cyane ariko uyu munsi, InyaRwanda yaguhitiyemo bimwe mu by’ingenzi bidateze kwibagirana mu mateka y’isi.

Tariki ya 11 Ukuboza, ni umunsi witiriwe ba Mutagatifu Sabin na Barsbas.

Bimwe mu byibukwa ku wa 11 Ukuboza mu mateka y’Isi:

1816: Indiana yabaye Leta ya 19 mu zigize Amerika.

1848: Igikomangoma Louis-Napoléon Bonaparte yatorewe kuyobora u Bufaransa, atsindiye ku majwi 74%.

1936: G. Kulin yavumbuye astéroïde (1436) yiswe Salonta.

1937: U Butaliyani bwikuye mu Muryango Mpuzabihugu (Société des nations – SDN).

1941: U Budage n’u Butaliyani byagabye ibitero kuri Leta Zunze Ubumwe za Amerika.

1957: Umuririmbyi Jerry Lee Lewis yashatseho umugore mubyara we Myra Gale Brown wari ufite imyaka 13.

1958: Haute Volta yabonye ubwigenge ihinduka Burkina Fasso.

1961: Ubwato bw’Abanyamerika butwara kajugujugu z’intambara bwageze i Saïgon, USA iba yinjiye ityo mu ntambara kuri Vietnam.

1962: Ni bwo abantu ba nyuma banyonzwe muri Canada. Abo ni Ronald Turpin na Arthur Lucas.

1976: Indege Ilyushin 76 y’Abasoviyete yasandariye i Leninakan, ihitana abantu 78.

1987: Ivatiri itezemo igisasu yahitanye abantu 11 i Saragosse muri Espagne.

1991: Leta Zunze Ubumwe z’Abasoviyete (U.R.S.S.) zarasheshwe, nyuma y’imyaka 74 y’amage, havuka u Burusiya.

1994: Boris Eltsine yategetse ko Ingabo z’u Burusiya zigarurira Chechnya na Techéchénie.

1999: Sonia Rolland yatorewe kuba Nyampinga w’u Bufaransa.

2000: Urukiko rw’Ubujurire rw’i Santiago rwakuyeho ikurikiranwa mu nkiko rya General Pinochet wigeze kuyobora Chili.

2006: Felip Cardelon wari Perezida wa Mexique, yashyizeho igisirikare kidasanzwe agiha inshingano yo kurwanya ihingwa n’icuruzwa ry’ibiyobyabwenge icyo gihugu cyamenyekanyemo cyane mu ruhando mpuzamahanga.

2008: Bernard Madoff, umuherwe w’Umunyamerika wabaye ikirangirire mu bijyanye n’ubushabitsi no gutsindira amasoko yahamijwe icyaha cy’ubushabitsi bwa magendu acibwa ihazabu ya miliyari zisaga 50$ ndetse nyuma mu 2009 aza gusabirwa n’urukiko gufungwa imyaka 150.

2012: Mu mujyi wa Aqrab wo muri Syria haturikirijwe ibisasu bihitana abantu 125, abandi 200 barakomereka.

Abavutse uyu munsi:

1475: Papa Leo X wabaye Umushumba wa Kiliziya Gatolika mu Kinyejana cya 16.

1982: Jimmy Gatete, wabaye umukinnyi ukomeye w’umupira w’amaguru muri APR FC n’Ikipe y’Igihugu Amavubi akanayihesha kwitabira bwa mbere Igikombe cya Afurika, CAN, muri Tunisia mu 2004.

Bamwe mu bitabye Imana uyu munsi:

384: Papa Damasus I wabaye Umushumba wa Kiliziya Gatolika mu Kinyejana cya Kane.

2008: Bettie Page, umunyamideli wari ufite inkomoko muri Leta Zunze Ubumwe za Amerika wamenyekanye cyane mu myaka ya 1950.