Women Basketball League Africa: APR WBBC na REG WBBC zitatangiye neza, amahirwe aracyari yose

Irushanwa rya Basketball ry’abagore ku rwego rw’Afurika, Women Basketball League Africa, rikomeje kubera i Dakar muri Senegal, rikaba ryaratangiye tariki ya 6 Ukuboza 2024, rikazasoza ku ya 15 Ukuboza. U Rwanda ruhagarariwe n’amakipe abiri APR WBBC na REG WBBC, kandi kugeza ubu amakipe yombi n’ubwo hari uko atitwaye neza mu buryo bukwiye, aracyafite amahirwe.

Ku mukino wa mbere, ikipe ya APR WBBC yerekanye imbaraga zidasanzwe itsinda C.N.S.S yo muri Congo Kinshasa ku manota 73 kuri 68. APR yitwaye neza cyane mu gace ka mbere (15-9) no mu gace ka gatatu (26-15).

Nyuma y'intsinzi ku mukino wa mbere, umukino wa kabiri ntiwababereye mwiza, kuko batsinzwe na Friend's Basketball Association yo muri Cote d’Ivoire ku manota 63-55. Ikipe ya APR yagowe cyane n’agace ka kabiri aho yatsinzwe amano(4-18.

N’ubwo batsinzwe umukino wa kabiri, APR iracyafite amahirwe yo gukomeza mu cyiciro gikurikira, cyane cyane binyuze mu mukino w’ejo tariki ya 10 Ukuboza 2024, aho bazahura na SC. Alexandria yo mu Misiri saa tatu z’ijoro.

Ikipe ya REG WBBC yo yatangiye itsindwa na Ferroviario Maputo yo muri Mozambique ku manota 78 kuri 74. REG yagaragaje intege nke mu gace ka mbere itsindwa (18-13) na ka kabiri itsindwa (20-18), ariko bigaragara ko yashyize imbaraga mu gace ka nyuma yatsinze (24-26), n’ubwo byari byatinze.

REG ifite amahirwe yo kwikosora kuri uyu wa Mbere, tariki ya 9 Ukuboza 2024, aho irahura na ASB MAKOMENO yo muri Congo Kinshasa, umukino uteganyijwe gutangira saa cyenda (15h00). Ikipe yifashishije imikino ibiri isigaje gukina mu matsinda, iracyafite amahirwe yo kuzamuka mu kindi cyiciro.

Mu Itsinda B, APR iri mu makipe afite amanota 3 nyuma y’imikino ibiri, aho buri kipe yose yatsinzwe umukino umwe, bigasobanura ko umukino wa nyuma w’amatsinda ugisobanuye byinshi.

Mu Itsinda C, REG imaze gukina umukino umwe gusa kandi iri ku mwanya wa nyuma n’inota 1. Mu mikino ibiri isigaye, REG ifite amahirwe yo kugenda yongera amanota yayo.

REG WBBC yatsinzwe umukino umwe yakinnye mu mikino nyafurika 

Mu mikino ibiri, APR WBBC imaze gutsinda umwe, itsindwa umwe