Ntwari Fiacre akomeje kwigizwayo! Uko Abanyarwanda bakina hanze bitwaye mu ntangiriro z'Ukuboza

Duhereye muri Kenya, kuwa Gatandatu w'icyumweru gishize ikipe ya AFC Leopards ikinamo Gitego Arthur yanganyije na Kakamega Homeboyz igitego 1-1. Kuri uyu mukino ntabwo uyu rutahizamu w'Umunyarwanda yabanje mu kibuga ndetse nta nubwo yari ku ntebe y'abasimbura, gusa amakuru avuga ko ashobora kuba yaragize ikibazo cy'imvune.

Kugeza ubu ikipe ya AFC Leopards iri ku mwanya wa 9 muri shampiyona ikaba izasubira mu kibuga ikina Tusker kuwa Gatatu w'iki Cyumweru.

Muri shampiyona y'icyiciro cya mbere muri Afurika y'Epfo, ku Cyumweru ikipe ya Kaizer Chiefs ikinamo Ntwari Fiacre yatsinzwe na Polokwane City ibitego 2-0. Ntabwo uyu mukinnyi w'Umunyarwanda yabanje mu kibuga ndetse nta nubwo yari ku ntebe y'abasimbura. 

Ntwari Fiacre akomeje kutaboneka mu bakinnyi bifashishwa na Kaizer Chiefs nyuma yuko mu mikino ya mbere ari we wari umunyezamu wa mbere, gusa abafana bakajya bamushinja kubatsindisha dore ko bashatse no kumukubita.

Kugeza ubu ikipe ya Kaizer Chiefs iri ku mwanya wa 9 muri shampiyona ikaba izasubira mu kibuga ikina na TS Galaxy kuwa Mbere w'ikindi Cyumweru.

Muri shampiyona y'icyiciro cya mbere muri Ukraine, ikipe ya FC Kryvbas Kryvyi Rih ikinamo Bizimana Djihad yatsinze FC Polissya Zhytomyr ibitego 3-1. Muri uyu mukino uyu Kapiteni w'Amavubi ntabwo yabanje mu kibuga gusa yinjiyemo asimbuye ku munota wa 68.

Kugeza ubu FC Kryvbas Kryvyi Rih iri ku mwanya wa Kane mu rutonde rwa shampiyona aho irushwa amanota 12 n'ikipe ya mbere ikaba izasubira mu kibuga ikina na Karpaty ku Cyumweru.

Muri shampiyona y'icyiciro cya mbere muri Azerbaijan, ejo ikipe ya FC Zira ikinamo Mutsinzi Ange yanyagiye ikipe yitwa Kapaz ibitego 4-0. Ntabwo uyu myugariro w'Amavubi yigeze akina uyu mukino ariko yari ku ntebe y'abasimbura.

Kugeza ubu FC Zira iri ku mwanya wa Kane ku rutonde rwa shampiyona ikaba izasubira mu kibuga ikina na Turan ku Cyumweru.

Ku Cyumweru muri shampiyona y'icyiciro cya mbere muri Cyprus, ikipe ya AEL Limassol ikinamo Imanishimwe Emmanuel Manguende yanyagiye ikipe ya Karmiotissa ibitego 4-0.

Uyu myugariro w'Amavubi yabanje mu kibuga gusa aza gusimbuzwa ku munota wa 62. Kugeza ubu AEL Limassol iri ku mwanya wa 8 muri shampiyona ikaba izasubira mu kibuga ikina na ALS Omonia ku Cyumweru.

Muri shampiyona y'icyiciro cya mbere muri Macedonia, ku Cyumweru ikipe ya Brera Strumica ikinamo Rwatubyaye Abdul yatsinzwe na Tikves ibitego 2-0. Uyu myugariro w'Amavubi yabanje mu kibuga ndetse arangiza n'umukino. 

Kugeza ubu ikipe ya Brera Strumica iri ku mwanya wa 8 ku rutonde rwa shampiyona ikaba izasubira mu kibuga kuwa Kabiri w'ikindi Cyumweru ikina na Pelister.

Muri shampiyona y'icyiciro cya kabiri mu Bubiligi, kuwa Gatandatu ikipe ya Raal La Louviere ikinamo Samuel Gueulette yatsinze Jong Genk ibitego 2-1. Uyu mukinnyi w'Umunyarwanda yabanje mu kibuga ndetse nta nubwo yigeze asimbuzwa. 

Kugeza ubu ikipe ya Raal La Louviere iri kumwanya wa kabiri ku rutonde rwa shampiyona ikaba izasubira mu kibuga ikina na RFC Seraing kuwa Gatanu w'iki Cyumweru.