Kylian Mbappé yashimagije Jude Bellingham

Ku munsi w'ejo ku wa Gatandatu Saa Yine z'ijoro nibwo ikipe ya Girona yari yakiriye Real Madrid kuri Estadi Municipal de Montilivi mu mikino yo ku munsi wa 17 wa shampiyona y'icyiciro cya Mbere mu gihugu cya Espagne.

Uyu mukino warangiye Real Madrid itsinze ibitego 3-0. Ni ibitego byatsinzwe bya Jude Bellingham ku munota wa 36,Arda Guler ku munota wa 55 ahawe umupira na Jude Bellingham ndetse na Kylian Mbappé ku munota wa 62 ahawe umupira na Luka Modric.

Nyuma y'uyu mukino, Kylian Mbappé yavuze ko utari woroshye dore ko bakinaga n'ikipe ikomeye.

Ati" Wari umukino utoroshye. Twari tuzi akamaro kawo, kandi tugomba gutsinda. Twakinaga n'ikipe ikomeye cyane mu rugo kandi igumana umupira cyane.

Twatangiye umukino neza, dutsinda igitego mu gice cya mbere. Igice cya kabiri, twagarutse dukomeye cyane kandi twahise dutsinda ibitego bibiri bikurikiranye. Nyuma yibyo, twagenzuye umukino".

Yavuze ko gufasha ikipe gutsinda biri mu kazi ke. Ati" Gufasha ikipe gutsinda biri mu kazi kanjye. Ndagerageza gukora ibi muri buri mukino, gukina no gufasha ikipe gutsinda".

Kylian Mbappé yashimagije Jude Bellingham avuga ko ari umukinnyi w'igitangaza bijyanye n'uko yitwaye muri uyu mukino ndetse anashimira n'abandi bakinnyi bitwaye neza.

Yagize ati " Bellingham ni igitangaza, ni umukinnyi mwiza. Nk'uko nabivuze buri gihe, gukina hano i Madrid uri hamwe nabakinnyi bo mu rwego rwo hejuru birashimishije. Uyu munsi, Bellingham yagize umukino ukomeye, kimwe n'abandi bakinnyi bakina imbere: Brahim na Arda Güler. 

N'abakinyi bo hagati, ba myugariro, n'abakinnyi bose baje basimbuye bakinnye neza. Turi ikipe, kandi nishimiye cyane intsinzi y'uyu munsi".

Kugeza ubu Real Madrid iri ku mwanya wa kabiri ku ku rutonde rwa shampiyona aho irushwa amanota 2 ariko ikaba igifite umukino umwe w'ikirarane.