Umutoza wa Manchester City yikomerekeje nyuma yo kumara imikino itandatu adatsinda

Kuwa Kabiri Saa Yine z'ijoro ni bwo ikipe ya Manchester City yari yakiriye Feyenoord kuri Etihad Stadium mu mikino yo ku munsi wa Gatanu wa UEFA Champions League.

Uyu mukino warangiye amakipe yombi anganyije ibitego 3-3 nyuma y'uko Manchester City ariyo yageze ku munota wa 75 iyoboye n'ibitego 3-0 ariko nyuma Feyenoord ikaza kuva inyuma ikishyura.

Nyuma y'uyu mukino wa Gatandatu ikipe ya Manchester City imaze idatsinda, umutoza wayo Pep Guardiola yagiye mu kiganiro n'itangazamakuru yakomeretse ku zuru ndetse mu gahanga haretsemo amaraso.

Abajijwe icyo yabaye, yavuze ko ari we wabikoze kugira ngo yibabaze. Yagize ati "Yego ni byo byavuye ku ntoki zanjye. Ni njye wikomerejeje n'intoki zanjye. Ndashaka kwibabaza".

Uyu mutoza yakomeje avuga ko mu mukino bakinaga neza, gusa bikarangira nabi. Yagize ati "Byatugoye, twakinaga neza, dufite icyizere, ariko birangira ikintu kibaye. 

Sinzi niba ari ikibazo cyo mu mutwe cyangwa icya tekinike. Ibi bitego twatsinzwe twashoboraga kutabitsindwa. Ubusanzwe dukina imikino neza, ariko ntabwo turi kuyitsinda, ibyo ni ibyiyumvo dufite ubu".

Pep Guardiola yavuze icyo kwishimira anavuga ko bakwiye kuruhuka bagatekereza ku mukino ukurikiyeho wa Liverpool. Yagize ati "Uruhande rwiza ni uko Haaland yongeye gutsinda igitego kandi imikorere ya Rico Lewis yabaye myiza cyane. Nyuma ya 3-3 nta kintu kinini cyo kuvuga, twakinnye umukino mwiza ariko ntushobora kubireka ngo bigende gutya.  

Imikino itatu ya nyuma igiye kuba ingenzi, tugomba gutekereza gukira tukava muri ibi bintu. Niba tudashoboye gutsinda umukino nk'uriya, iyi Champions League izagorana. Tugomba kuruhuka no gutekereza kumikino itaha" 

Kugeza ubu muri UEFA Champions League Manchester City iri ku mwanya wa 15 n'amanota 8, ikaba izasubira mu kibuga ikina na Liverpool ku Cyumweru muri shampiyona.

Pep Guardiola yikomerejeje nyuma yo kunganya na Feyenoord ibitego 3-3