Umutoza wa Bugesera FC araregetse

Kuri uyu wa Gatatu Saa Kumi n'Ebyiri nibwo ikipe ya APR FC iraba yakiriye Bugesera FC kuri Kigali Pelé Stadium mu mukino w'ikirarane cyo ku munsi wa Kabiri wa shampiyona y'icyiciro cya mbere mu Rwanda.

Mu gihe uyu mukino ikipe ya Bugesera FC yawutakaza, umutoza wayo Haringingo Christian Francis yahita yirukanwa. 

Amakuru yizewe InyaRwanda ifite ni uko ku Cyumweru tariki ya 24 z'uku kwezi, ubuyobozi bwa Bugesera FC bwamwandikiye ibaruwa bumumenyesha ko asabwa kubona amanota 6 mu mikino 3, bitaba ibyo hagafatwa izindi ngamba zirimo no kwirukanwa. 

Iyo mikino yasabwe kubonamo aya manota ni uwa Vision FC,uwa APR FC ndetse n'uwa Muhazi United. Ubwo bivuze ko asabwa gutsinda umukino wo ku munsi w'ejo wa APR FC ndetse akazanatsinda uwa Muhazi United.

Mu gihe Bugesera FC yatsindwa na APR FC,Haringingo yahita yerekwa umuryango kuko yaba ibyo kubona amanota 6 ntabwo byaba bigikunze dore ko uwa Vision FC yamaze kuwutsindwa ibitego 2-1.

Kugeza ubu iyi kipe y'akarere ka Bugesera iri ku mwanya wa 13 n'amanota 8 inganya na Etincelles FC iri kumwanya wa 15 ikaba irusha amanota 2 Kiyovu Sports iri ku mwanya wa nyuma.

Haringingo Christian Francis yageze mu ikipe ya Bugesera mu mwaka ushize asimbuye Eric Nshimiyimana, akaba yarasinye amasezerano y'umwaka umwe n'igice.

Haringingo Christian Francis uzirukanwa na Bugesera FC naramuka atsinzwe n'ikipe ya APR FC